सांगली : सांगली, मिरज आणि कुपवाड महानगरपालिकेच्या निवडणुकीत 39 जागा जिंकून भाजप सत्तेच्या उंबरठ्यावर उभा आहे. भाजपचे बहुमत अवघ्या एका जागेने हुकले. दरम्यान, काँग्रेसला 18, राष्ट्रवादी (अजित पवार) पक्षाला 16, राष्ट्रवादी (शरदचंद्र पवार) पक्षाला 3, तर शिवसेनेला 2 जागा मिळाल्या. शिवसेना (उ.बा.ठा.)ला खातेही खोलता आले नाही. या निवडणुकीत महायुतीतील घटकपक्ष असलेले भाजप, शिवसेना आणि राष्ट्रवादी स्वतंत्रपणे लढले. राष्ट्रवादीने तर काँग्रेस व राष्ट्रवादी (शरदचंद्र पवार) पक्षाच्या आघाडीशी अघोषित समझोता केला होता.
शुक्रवार, दि. 16 रोजी मतमोजणी पूर्ण झाल्यानंतर भाजपचे नेते पालकमंत्री चंद्रकांत पाटील आणि शिवसेनेचे नेते आमदार सुहास बाबर यांनी दूरध्वनीवरून एकमेकांना विजयाच्या शुभेच्छा दिल्या. त्यामुळे महापालिकेत भाजप-शिवसेना युतीची सत्ता येणार, हे स्पष्ट झाले आहे.
दरम्यान, महापालिकेतील सत्तेसाठी भाजप-शिवसेना युतीबाबत वरिष्ठ स्तरावरून निर्णय होईल, असे खात्रीशीर सूत्रांनी सांगितले. आत्मविश्वास हरवलेल्या काँग्रेसने या निवडणुकीत 18 जागा जिंकून दुसरे स्थान पटकावले. उपमुख्यमंत्री अजित पवार यांच्या नेतृत्वाखालील राष्ट्रवादीनेही 16 जागा जिंकून लक्षवेधी कामगिरी केली. 78 जागांसाठी तब्बल 381 उमेदवार रिंगणात होते. या निवडणुकीत सुरुवातीला भाजपचे पारडे जड वाटत होते. महापालिकेच्या 2018 च्या निवडणुकीत भाजपने स्वबळावर सत्ता मिळवली होती. यावेळीही स्वबळावर महापालिकेवर पुन्हा झेंडा फडकवण्याचा भाजपचा इरादा होता.
चंद्रकांत पाटील-सुहास बाबर यांची चर्चा
निवडणुकीचे सर्व जागांचे निकाल जाहीर झाल्यानंतर भाजपचे नेते पालकमंत्री चंद्रकांत पाटील व शिवसेनेचे नेते आमदार सुहास बाबर यांची फोनवरून चर्चा झाली. एकमेकांना शुभेच्छा दिल्या. भाजप-शिवसेना युतीचा निर्णय वरिष्ठ नेते घेतील, असे ठरले. आ. बाबर म्हणाले, शिवसेनेचे पॅनेल अवघ्या दीड दिवसात उभारले. सेनेला 50 ते 60 हजार मते मिळाली आहेत. सेनेचे दोन उमेदवार विजयी झाले आहेत. सांगली महापालिका क्षेत्राच्या विकासासाठी शिवसेना कटिबद्ध आहे. उपमुख्यमंत्री एकनाथ शिंदे यांच्या माध्यमातून नगरविकास खात्यातून महापालिकेला भरीव निधी मिळवू.
महापौर महायुतीचा होणार : गाडगीळ
आमदार सुधीर गाडगीळ म्हणाले, महापालिकेचा महापौर महायुतीचाच होईल. सत्ता स्थापनेसंदर्भात भाजपकडून शिवसेना व राष्ट्रवादी (अजित पवार) यांच्याशी चर्चा होईल. भाजपला 40 हून अधिक जागा मिळतील, असा अंदाज होता, पण काही जागांवर अनपेक्षितपणे पराभव झाला आहे. जनतेचा कौल मान्य करून सांगलीच्या विकासासाठी कार्यरत राहू.
