महेश देसाई / कवठेमहांकाळ : अपघात झाला... जखमी रस्त्यावर पडले... नातेवाईकांची धावपळ सुरू झाली... आणि काही मिनिटांत ‘१०८’ रुग्णवाहिका घटनास्थळी दाखल झाली. जीव वाचविण्यासाठी शासनाची ही रुग्णवाहिका जखमीला घेऊन धावते; मात्र ही धाव शासकीय रुग्णालयाकडे जाते, की खासगी रुग्णालयाकडे, हा प्रश्न आता कवठेमहांकाळ तालुक्यात गंभीर बनला आहे.
कवठेमहांकाळ तालुक्यातून रत्नागिरी–नागपूर राष्ट्रीय महामार्ग, तसेच गुहागर–विजापूर राज्य मार्ग जातो. त्यामुळे अपघातांचे प्रमाणही मोठे आहे. अशा स्थितीत ‘१०८’ रुग्णवाहिका ही नागरिकांसाठी महत्त्वाची आपत्कालीन सेवा आहे. मोरगाव येथे अग्रणी नदीवरील पुलावर अलीकडेच अपघात झाला. या अपघातातील जखमींना ‘१०८’ रुग्णवाहिकेतून मिरज–सांगली मार्गावरील खासगी रुग्णालयात दाखल केल्याची माहिती समोर आली.
कवठेमहांकाळ, मिरज, सांगली येथे शासकीय आरोग्य यंत्रणा उपलब्ध असताना जखमींना थेट
खासगी रुग्णालयात नेण्याचे कारण काय, असा प्रश्न उपस्थित झाला आहे. रुग्णाला कोणत्या रुग्णालयात दाखल करायचे, याचा निर्णय कोण घेतो? रुग्णवाहिका कर्मचारी, की नातेवाईक? जखमींना ठराविक खासगी रुग्णालयाचा रस्ता दाखविला जातो का? यामागे वैद्यकीय गरज असते, की आणखी काही?
