सांगली : महापालिकेचे मुख्य अग्निशमन अधिकारी सुनील कृष्णा माळी यांच्यावर झालेल्या खुनी हल्लाप्रकरणी संशयित प्रथमेश सुरेश पाटोळे (वय 23, रा. दत्तनगर, बामणोली) व तोहीद ऊर्फ हुसेन फारूख सुतार (वय 19, रा. हांडे गल्ली, दत्तनगर, बामणोली) या दोघांना सांगली शहर पोलिसांनी अटक केली.
दरम्यान, या प्रकरणातील आणखी दोघे पसार असून त्यांचा शोध सुरू आहे. पोलिसांच्या प्राथमिक तपासात सुपारी देऊन हा खुनी हल्ला केल्याची शक्यता वर्तवली जात आहे. परंतु नेमक्या कोणत्या कारणातून सुपारी दिली, याचा शोध सुरू आहे. महापालिकेचे प्रभारी मुख्य अग्निशमन अधिकारी म्हणून कार्यरत असलेले माळी मंगळवारी सायंकाळी मित्र शंकर बाजीराव जगदाळे यांच्यासोबत दुचाकीवरून घरी निघाले होते. कलानगर येथील घराजवळ आल्यानंतर माळी दुचाकीवरून खाली उतरताच हल्लेखोरांनी माळी यांना ‘आता तुला सोडत नाही’ असे म्हणून चाकूने पोटात उजव्या बाजूला वार केला. माळी यांच्या मित्रांनी आरडाओरडा केल्यानंतर संशयितांनी दुचाकीवरून घटनास्थळावरून पलायन केले. माळी यांच्यावर खासगी रुग्णालयात उपचार सुरू आहेत. शंकर जगदाळे यांनी याबाबत शहर पोलिस ठाण्यात फिर्याद दिली आहे.
शहर पोलिस ठाण्यातील गुन्हे प्रकटीकरण शाखेने संशयित प्रथमेश पाटोळे व तोहीद सुतार या दोघांना ताब्यात घेत बुधवारी रात्री अटक केली. गुरुवारी त्यांना न्यायालयासमोर हजर केले असता चार दिवसाची पोलिस कोठडी सुनावण्यात आली. दोघांची कसून चौकशी सुरू आहे. आणखी दोघे संशयित पसार असून त्यांचा शोध सुरू आहे. अटकेतील दोघांची कसून चौकशी सुरू आहे. प्राथमिक तपासात सुपारी देऊन हा हल्ला केल्याची शक्यता वर्तवली जात आहे. परंतू नेमके कारण काय? हे अद्याप तपासात स्पष्ट झाले नाही.
प्रथमेश पाटोळे रेकॉर्डवरील गुन्हेगार
शहर पोलिसांनी कलानगर येथील सीसीटीव्ही फुटेजवरून प्रथमेश व तोहीद या दोघांना अटक केली आहे. प्रथमेश पाटोळे हा पोलिस रेकॉर्डवरील गुन्हेगार सराईत असल्याचे स्पष्ट झाले आहे. संशयितांना कोणीतरी सुपारी दिल्याची शक्यता असून त्यादृष्टीने तपास सुरू आहे.
