कवठेमहांकाळ : कवठेमहांकाळ-देशिंग मार्गावरील मोरगावच्या अग्रणी नदी पुलाजवळ डीजे साऊंड सिस्टिमचे बॉक्स जोडलेल्या टेम्पोच्या पाठीमागील बॉक्सला दुचाकीने जोरदार धडक दिल्याने एकाचा मृत्यू झाला, तर दोघे गंभीर जखमी झाले. काशिनाथ बापू नंदीवाले (वय ४२, रा. कोथळी, ता. शिरोळ) असे मृताचे नाव आहे. परशुराम बापू नंदीवाले व माणिक नाकाराम नंदीवाले (दोघेही रा. कोथळी) हे जखमी झाले आहेत. सोमवारी (दि. २१) सायंकाळी हा अपघात झाला.
मिरज तालुक्यातील कळंबी येथून डीजे साऊंड सिस्टिमचे बॉक्स जोडलेला टेम्पो (एमएच ०४, डीके ००८१) कवठेमहांकाळच्या दिशेने येत होता. त्याचवेळी कवठेमहांकाळहून कोथळी येथे जाणारे तिघे दुचाकी (एमएच ५१ एच ५९०४) वरून प्रवास करीत होते. मोरगावच्या अग्रणी नदी पुलाजवळ दुचाकी टेम्पोच्या पाठीमागील साऊंड बॉक्सला जोरदार धडकली.
