जत : तालुक्यातील बिळूर येथील राजेंद्र (राजू) गणपती कोळी (वय 50) या शेतकऱ्याचा अज्ञात वाहनाने दिलेल्या धडकेत मृत्यू झाला. ही घटना मंगळवारी पहाटे सहा वाजण्याच्या सुमारास बिळूर-जत रस्त्यावर घडली.
राजेंद्र कोळी हे मंगळवारी पहाटे बिळूर-जत रस्त्यावरून शौचास जात होते. गावाजवळील पुलाजवळ आले असता, पाठीमागून आलेल्या एका भरधाव अज्ञात वाहनाने त्यांना जोरदार धडक दिली. या भीषण अपघातात कोळी हे गंभीर जखमी होऊन रस्त्यावर कोसळले. उपचारादरम्यान त्यांचे निधन झाले. अपघातानंतर स्थानिकांनी त्यांना तातडीने जत येथील ग्रामीण रुग्णालयात दाखल केले. तेथे प्राथमिक उपचार केल्यानंतर प्रकृती चिंताजनक असल्याने त्यांना अधिक उपचारासाठी मिरज येथील शासकीय रुग्णालयात हलवण्यात आले. मात्र, उपचार सुरू असतानाच त्यांचे निधन झाले.
