इस्लामपूर : राजारामबापू पाटील सहकारी साखर कारखान्याच्या साखराळे, वाटेगाव- सुरुल व कारंदवाडी युनिटकडील सन 2024-25 हंगामातील ऊसास पहिला हप्ता 3200 रुपये प्रतिटन देणार आहे. सन 2024- 25 मधील अंतिम दर अंदाजे 3275 रुपये अपेक्षित असून उर्वरित रक्कम दिपावलीच्या सणास देणार असल्याची माहिती कारखान्याचे अध्यक्ष प्रतिक पाटील यांनी दिली. तसेच जत-तिप्पेहळ्ळी युनिटकडील ऊस दराचा निर्णय लवकरच घेतला जाईल असेही त्यांनी सांगितले.
अध्यक्ष प्रतिक पाटील म्हणाले, की राजारामबापू पाटील सहकारी साखर कारखान्याच्या माध्यमातून ऊस विकासाच्या विविध योजना राबविल्या जात आहेत. ठिंबक सिंचन योजना, सच्छिंद्र पाईप योजना, विविध खते, जैविक खते कारखान्याच्या माध्यमातून शेतकर्यांना पुरविली जात आहे.
पाटील म्हणाले, की कारखाना व्यवस्थापनाने सन 2024-25 हंगामात साखराळे युनिटकडे 9 लाख 50 हजार मे.टन वाटेगाव- सुरुल युनिटकडे 5 लाख मे.टन, कारंदवाडी युनिटकडे 4 लाख 50 हजार मे.टन तसेच जत-तिप्पेहळ्ळी युनिटकडे 3 लाख असे एकूण 22 लाख मेट्रिक टन ऊस गाळपाचे उदिष्ट ठेवले आहे. तरी सर्व ऊस उत्पादक व सभासद यांनी पिकविलेला सर्व ऊस गळीतास पाठवून सहकार्य करावे असे आवाहन पाटील यांनी केले आहे.
याप्रसंगी कारखान्याचे उपाध्यक्ष विजयराव पाटील, संचालक देवराज पाटील, प्रदिपकुमार पाटील, कार्तिक पाटील, विठ्ठल पाटील, कार्यकारी संचालक आर.डी.माहुली, मुख्य शेती अधिकारी प्रशांत पाटील, चिफ अकौंटंट संतोष खटावकर उपस्थित होते.
