कुपवाड : कुपवाड एमआयडीसी कानडवाडी रस्त्यालगत असलेल्या पवन अॅग्रोटेक गोदाम, मिरज एमआयडीसी रस्त्यालगत असलेल्या अशोका बार शेजारील राजयोग ओवरसिस गोदाम, सावळी ते कानडवाडी रस्त्यालगत असलेल्या सांगली मार्केट कमिटीच्या समोरील बाजूस असलेल्या अंजनी ट्रेडर्स गोदाम तसेच दादू वॉशिंग सेंटर गोदाम अशा चारही गोदामांतील एकूण 6 लाख 79 हजार 500 रुपये किमतीच्या बेदाणे बॉक्सची चोरट्यांनी वेगवेगळ्या दिवशी चोरी केल्याची तक्रार कुपवाड पोलिस ठाण्यात दाखल झाली आहे. पोलिसांनी अज्ञातांविरोधात गुन्हा दाखल केला आहे.
पोलिसांनी दिलेली माहिती अशी : नितीन कटारिया (रा. माधवनगर रोड, कलानगर, सांगली) यांचे कुपवाड एमआयडीसी ते कानडवाडी रस्त्यालगत पवन अॅग्रोटेक गोदाम आहे. चोरट्यांनी दि. 25 एप्रिल 2025 रोजी सकाळी 10 वाजण्याच्या सुमारास गोदामाचा लोखंडी पत्रा उचकटून चोरट्यांनी आत प्रवेश केला. गोदामातील 2 लाख 55 हजार 750 रुपये किमतीचे वेगवेगळ्या बेदाण्यांच्या बॉक्सची चोरी केली आहे. राजयोग ओवरसिस गोदामाच्या पाठीमागील बाजूच्या दरवाजाचे लोखंडी शटर उचकटून चोरट्यांनी आत प्रवेश केला. गोदामातील 2 लाख 92 हजार 500 रुपये किमतीचे वेगवेगळे बेदाण्यांचे बॉक्स चोरी केल्याची घटना मंगळवारी सकाळी उघडकीस आली.
सावळी ते कानडवाडी रस्त्यालगत असलेल्या सांगली मार्केट कमिटीच्या समोरील अंजनी ट्रेडर्स या गोदामाच्या गेटचे कुलूप तोडून चोरट्यांनी गोदामातील 63 हजार 750 रुपयांच्या बेदाणे बॉक्सची चोरी केल्याची घटना सोमवारी सकाळी उघडकीस आली. तसेच शेजारील दादू वॉशिंग सेंटर मधील दि. 15 एप्रिल ते 16 एप्रिल 2025 या कालावधीत चोरट्यांनी गोदामाचे कुलूप तोडून गोदामातील 67 हजार 500रुपये किमतीच्या बेदाण्यांची चोरी केल्याची तक्रार कुपवाड पोलिस ठाण्यात दाखल झाली आहे. पोलिस तपास करीत आहेत.
