विटा : जनावरांची चोरी करणारा अट्टल चोरटा पकडण्यात विटा पोलिसांना यश आले. सागर जालिंदर पाटोळे (वय 30, वेजेगाव, ता. खानापूर) असे चोरट्याचे नाव आहे. त्याचा सहकारी असलेल्या अल्पवयीन मुलालाही ताब्यात घेण्यात आले आहे. त्यांच्याकडून 1 लाख 55 हजार रुपये किंमतीच्या सहा म्हशी ताब्यात घेतल्याचे पोलिस निरीक्षक धनंजय फडतरे यांनी सांगितले. दरम्यान, पाटोळे यास अटक करून न्यायालयात हजर केले असता न्यायाधीशांनी त्यास एक दिवस पोलिस कोठडीत ठेवण्याचा आदेश दिला, तर अल्पवयीन मुलाला नोटीस दिल्याचे पोलिसांनी सांगितले.
वलखड (ता. खानापूर) येथील राजाराम यशवंत जगदाळे यांनी त्यांच्या शेतातील गोठ्यातून 23 व 24 मार्च 2025 च्या दरम्यान तीन म्हशींची चोरी झाल्याची फिर्याद विटा पोलिसांत दिली होती. त्यानुसार चोरीच्या गुन्ह्याच्या तपासाच्या अनुषंगाने पोलिस निरीक्षक धनंजय फडतरे यांनी गुन्हे प्रकटीकरण पथकास तपासाच्या सूचना दिल्या होत्या. त्या अनुषंगाने पथकातील अंमलदार महेश देशमुख यांना वेजेगाव येथील सराईत गुन्हेगार सागर पाटोळे याने वलखड येथील म्हशींची चोरी केल्याची तसेच तो चिखलहोळ फाटा येथे फिरत असल्याची माहिती मिळाली. यावर गुन्हे प्रकटीकरण पथकामधील अंमलदारांनी तत्काळ चिखलहोळ फाटा येथे सापळा रचून पाटोळे यास ताब्यात घेतले. अधिक चौकशी केली असता त्याने वलखड येथील राजाराम यशवंत जगदाळे यांच्या शेतातील गोठ्यातून म्हैशींची चोरी केल्याची कबुली दिली. तसेच चिखलहोळ, माहुली व भाग्यनगर येथून प्रत्येकी एक म्हैस चोरी केल्याचे सांगितले.
दरम्यान, ताब्यात घेण्यात आलेल्या म्हशी मालकांना परत दिल्याचे पोलिसांनी सांगितले. ही कारवाई पोलिस निरीक्षक धनंजय फडतरे यांच्या मार्गदर्शनाखाली पोलिस निरीक्षक रूपाली बोबडे, अमोल पाटील, उत्तम माळी, दिग्विजय कराळे, हेमंत तांबेवाघ, विकास जाधव, महेश देशमुख, महेश संकपाळ, अमोल कदम, संभाजी सोनवणे, अक्षय जगदाळे, सतीश आलदर, करण परदेशी, अभिजित पाटील, अजय पाटील यांनी केली.
