मिरज : शहरातील बोकड चौकात बेकायदेशीररीत्या सुरू असणार्या कत्तलखान्यावर छापा टाकून मिरज शहर पोलिसांनी मोठी कारवाई केली. यावेळी कत्तलीसाठी आणलेल्या ३७ गायी, कालवड व म्हैस, अशी जनावरे जप्त करण्यात आली. तसेच कत्तल केलेले तब्बल १ हजार ४०० किलो गोमांस जप्त करण्यात आले. मिरज शहर पोलिसांनी ही कारवाई केली.
याप्रकरणी अजिज बेपारी, सलमान हारुण बेपारी, लाल्या आणि सूरज कबीर सय्यद (सर्व रा. मिरज) या चौघांविरुद्ध गुन्हा दाखल करण्यात आला असून ते पसार झाले आहेत. मिरज शहर पोलिस निरीक्षक किरण चौगले यांच्या पथकाने बुधवारी सकाळी कत्तलखान्यात छापा टाकला. या ठिकाणी तब्बल एक हजार ४०० किलो गोमांस मिळून आले. तसेच कत्तल करण्यासाठी पाच मोठ्या गायी, २४ गोवर्गीय कालवडी आणि ८ म्हैसवर्गीय रेडके मिळून आले. या कालवडींचा आवाज होऊ नये म्हणून त्यांच्या तोंडाला चिकटपट्ट्या लावण्यात आल्या होत्या.
