जत : साळमळगेवाडी (ता. जत) येथे भाजीपाल्यामध्ये गांजाची बेकायदा लागवड केलेल्या ठिकाणी छापा टाकून 12 लाख 85 हजार किमतीचा गांजा जप्त करण्यात आला. कारवाईत 128 किलो ओला गांजा जप्त करण्यात आला आहे. गांजाची लागवड करणार्यात अटक करण्यात आली आहे. गुरुवारी रात्री उशिरा जत पोलिसांच्या पथकाने ही कारवाई केली. याप्रकरणी पोलिसांनी संजय प्रभाकर गिरीबुवा (वय 48, रा. साळमाळगेवाडी) याच्यावर गुन्हा दाखल केला आहे. त्याला न्यायालयाने चार दिवसांची पोलिस कोठडी सुनावली.
पोलिसांना शेतात गांजाची लागवड केल्याची जत पोलिसांना माहिती मिळाली होती. पोलिसांनी पथक तयार करुन गुरुवारी रात्री गिरीबुवा याच्या शेतात छापा टाकला. कारवाईत भाजीपाल्यामध्ये लागवड केलेली 6 ते 8 फुटाची गांजाची ओली झाडे जप्त करण्यात आली. त्याचे वजन 128 किलो 503 ग्रॅम भरले. त्याची बाजारभावानुसार किंमत 12 लाख 85 हजार 40 रुपये होते. याप्रकरणी गिरीबुवा याच्याविरोधात भारतीय न्याय संहितेनुसार बेकायदा औषधी द्रव व मनोव्यापारावर परिणाम करणारे पदार्थ अधिनियमानुसार गुन्हा दाखल करण्यात आला आहे.
याबाबतची फिर्याद उपनिरीक्षक प्रशांत चव्हाण यांनी जत पोलिस ठाण्यात दिली आहे. कारवाईमध्ये पोलिस निरीक्षक संदीप कोळेकर, उपनिरीक्षक प्रशांत चव्हाण, पोलिस नाईक राजेंद्र सावंत, विनोद सकटे, विक्रम घोदे, तोहिद मुल्ला, सुभाष काळे, नवनाथ करांडे यांनी सहभाग घेतला होता. याप्रकरणी सहाय्यक निरीक्षक बिरप्पा लातुरे अधिक तपास करत आहेत.
जत तालुक्यात गांजा लागवडीच्या घटना समोर येत आहेत. ग्रामस्थांनी गांजा लागवडधारकांची नावे कळवावीत, माहिती देणार्यांची नावे गोपनीय राहतील, असे आवाहन जत पोलिसांनी केले आहे.
