सांगली : ऊसतोड मजूर पुरविण्याच्या बहाण्याने वाहतूकदाराकडून 17 लाखांची रक्कम घेतली. त्यापैकी 8 लाख 60 हजार रुपये काम करून फेडले, तर उर्वरित 8 लाख 40 हजारांच्या कामाची परतफेड न करता तसेच ती रक्कमही परत न देता वाहतूकदाराची फसवणूक केली. याप्रकरणी भाऊसाहेब लक्ष्मण देसाई यांनी अंकुश मधुकर गेजगे (वय 35) आणि दिलीप मधुकर गेजगे (वय 25) या दोघांविरद्ध सांगली ग्रामीण पोलिस ठाण्यात फिर्याद दिली आहे.
फिर्यादी भाऊसाहेब देसाई हे समडोळी येथील वाहतूकदार आहेत. त्यांना सन 2024-25 या गळीत हंगामासाठी ऊसतोड कामगार हवे होते. त्यासाठी त्यांनी गेजगे यांच्याशी संपर्क साधला. त्यांनी कामगार पुरविण्याचे आश्वासन दिले. देसाई यांनी दोघांना सुरुवातीला 11 लाख 75 हजार, त्यानंतर 5 लाख 25 हजार असे 17 लाख रुपये दिले होते. त्यानंतर संशयितांनी कामगार पुरवून 8 लाख 60 हजार रुपयांची परतफेड केली. पण त्यानंतर कामगारच पुरविले नाहीत. देसाई यांनी त्यांच्याकडे वारंवार पैशाची मागणी करूनही पैसेही परत दिले नाहीत. फसवणूक झाल्याचे लक्षात येताच त्यांनी सांगली ग्रामीण पोलिस ठाण्यात दोघांविरुद्ध गुन्हा दाखल केला आहे.
