सांगली : गॅसच्या नोंदणीनंतर 48 तासात नागरिकांना घरपोहोच सिलिंडर देण्यात यावा, ग्राहकांनी एजन्सीपुढे गर्दी करू नये, अशा सूचना जिल्हा पुरवठा विभागातील अधिकाऱ्यांनी दिल्या. सोमवारी यासंदर्भात जिल्हाधिकारी कार्यालयात गॅस एजन्सी चालकांची बैठक घेण्यात आली. जिल्हा पुरवठा अधिकारी आशिष फुलूके, सहायक जिल्हा पुरवठा अधिकारी रूपाली सोळुंके, अन्नधान्य वितरण अधिकारी राजू कदम उपस्थित होते.
बैठकीमध्ये सर्व गॅस वितरकांनी ओटीपी प्रणालीद्वारे घरपोहोच गॅस सिलिंडरचे वितरण करावे, अशा सूचना देण्यात आल्या. सध्या जिल्ह्यात पुरेसा एलपीजीचा साठा उपलब्ध आहे. एचपीसीएल कंपनीचा 2128 मेट्रिक टन, बीपीसीएल कंपनीचा 208 टन आणि आयओसीएल कंपनीचा 44 टन इतका साठा उपलब्ध असून आणखी 1096.3 मेट्रिक टन एलपीजी साठा जिल्ह्यात येत आहे. त्यामुळे जिल्ह्यातील घरगुती ग्राहकांना गॅस सिलिंडरचा पुरवठा सुरळीत सुरू राहणार आहे, असेही त्यांनी यावेळी सांगितले.
