पनवेल; पुढारी वृत्तसेवा: नवी मुंबई महानगरपालिका कार्यक्षेत्रामध्ये पाणीपुरवठा करणारी मोरबे धरणाची २०४२ मिमी व्यासाची मुख्य जलवाहिनी मार्बल मार्केट कळंबोली येथे आज (दि.१२) सकाळी १० वाजता फुटली. दाब वाढून वाहिनी फुटल्याने लाखो लिटर पाणी वाया गेले. कामोठे येथील स्थानिक रहिवासी मंगेश आढाव यांच्या लक्षात ही घटना आल्यानंतर त्यांनी सिडको जल विभागाला माहिती दिली.त्यानंतर तत्काळ जलवाहिनीची दुरुस्ती सुरू करण्यात आली.
दुरुस्ती कामासाठी भोकरपाडा जलशुद्धीकरण केंद्रातून नवी मुंबई महानगरपालिका क्षेत्रात होणारा पाणीपुरवठा तातडीने बंद करण्यात आला आहे. दुरुस्तीचे काम युद्धपातळीवर सुरू असल्याने नवी मुंबई महानगरपालिका क्षेत्रात व सिडको क्षेत्रातील खारघर व कामोठे येथे आज संध्याकाळी पाणी पुरवठा होणार नाही. तसेच उद्या सकाळचा पाणी पुरवठा कमी दाबाने होईल. तसेच नागरिकांनी पाणी जपून वापरावे व प्रशासनास सहकार्य करावे, असे आवाहन अतिरिक्त शहर अभियंता (स्थापत्य) यांनी केले आहे.
