उरण: तीन वर्षांच्या सावत्र मुलाचा किरकोळ कारणावरून शारीरिक व मानसिक छळ करत त्याची निर्घृण हत्या केल्याची धक्कादायक घटना उरण तालुक्यात उघडकीस आली आहे. हत्येनंतर हा प्रकार लपवण्यासाठी बालकाचा पलंगावरून पडून मृत्यू झाल्याचा बनाव रचणाऱ्या सावत्र बापाविरुद्ध मोरा सागरी पोलीस ठाण्यात गुन्ह्याची नोंद करण्यात आली आहे.
या नराधमाने १४ ऑगस्ट रोजी दुपारच्या सुमारास घरात एकटा असलेल्या ३ वर्षे ५ महिने वयाच्या या बालकावर गंभीर हल्ला केला. हा मुलगा त्यांच्या पत्नीचा पहिल्या पतीपासून झालेला मुलगा असल्याने, हा नराधम त्याच्यावर राग धरून होता व त्याला सतत मारहाण करत असे.
घटनेच्या दिवशी त्याने चिमुरड्याला हाताच्या ठोशांनी व जमिनीवर किंवा भिंतीवर आपटून गंभीर दुखापत केली, ज्यामध्ये बालकाचा मृत्यू झाला. घटनेनंतर आरोपीने गुन्हा लपवण्यासाठी आणि पोलिसांची दिशाभूल करण्यासाठी मुलगा खेळताना पलंगावरून खाली पडून बेशुद्ध झाल्याचा बनाव रचला.
त्याला तातडीने इंदिरा गांधी ग्रामीण रुग्णालय, उरण येथे दाखल करण्यात आले, जिथे डॉक्टरांनी तपासणीअंती त्याला मृत घोषित केले. सुरुवातीला पोलिसांनी अकस्मात मृत्यूची नोंद केली होती. मात्र, १५ ऑगस्ट रोजी प्राप्त झालेल्या शवविच्छेदन अहवालात बालकाच्या डोक्याला गंभीर दुखापत झाली असून शरीरावर अनेक ठिकाणी मारहाणीच्या खुणा आणि फ्रॅक्चर असल्याचे निष्पन्न झाले.
हा मृत्यू अपघाती नसून मारहाणीमुळे झालेला मनुष्यवध असल्याचे वैद्यकीय अधिकाऱ्यांनी स्पष्ट केले. या अहवालानंतर आणि परिसरातील साक्षीदारांच्या चौकशीनंतर मोरा सागरी पोलीसांनी आरोपी नराधमाच्या विरोधात भारतीय न्याय संहिता (हत्या) आणि बाल न्याय (मुलांची काळजी व संरक्षण) कायदा २०१५ चे कलम ७५ अन्वये गुन्हा दाखल केला आहे. या प्रकरणाचा पुढील तपास पोलीस करत आहेत.
