Rajyabhishek Ceremony organized at Fort Raigad
महाड : श्रीकृष्ण बाळ
हिंदवी स्वराज्याची राजधानी असणार्या किल्ले रायगडावर छत्रपती शिवाजी महाराजांचा ज्येष्ठ शुद्ध त्रयोदशी शिवशक 352 या तिथीनुसार साजरा केला जाणारा शिवराज्याभिषेक दिन सोहळा आठ जून ते नऊ जून या कालावधीत संपन्न होत आहे.
शासनाने हा कार्यक्रम शासकीय इतमामात करण्याची घोषणा केली असून त्यासाठी सोमवारी (9 जून) राज्याचे मुख्यमंत्री देवेंद्र फडणवीस यांसह उपमुख्यमंत्री एकनाथ शिंदे व अजित पवार मंत्रीमंडळातील आपल्या अनेक सहकारी मंत्र्यांसह उपस्थित राहतील अशी माहिती संयोजन समितीच्या वतीने देण्यात आली आहे.
हा सोहळा आपल्या डोळ्यांमध्ये साठवण्यासाठी महाराष्ट्राच्या कानाकोपर्यातून हजारोंच्या संख्येने शिवभक्त किल्ले रायगडावरती दाखल झाले आहेत. राज्याभिषेक सोहळ्याच्या पूर्व दिनी शिरकाई देवीच्या पूजनापासून या सोहळ्याला सुरुवात झाला असून शिवभक्तीच्या जागरात संपूर्ण रायगड दुमदुमून गेल्याचे चित्र पाहायला मिळत आहे.
शिवराज्याभिषेक दिनोत्सव सेवा समिती दुर्गराज रायगड व कोकणकडा मित्र मंडळ, रायगड यांच्या वतीने या सोहळ्याचे आयोजन करण्यात आले आहे. पूर्वसंध्येला झालेल्या ही रात्र शाहिरांची या कार्यक्रमाने उपस्थित शिवभक्तांची मनी जिंकत रायगडावर जणू शिवकाळ अवतरला होता.
शिरकाई देवीच्या पूजनाने सुरू झालेल्या या सोहळ्यात छत्रपती संभाजी महाराज यांची जयंती देखील साजरी करण्यात आली तसेच जगदीश्वर व वाडेश्वर मंदिरात निमंत्रित जोडप्यांच्या हस्ते पूजा संपन्न झाली. पूर्वसंध्येला मुख्यरासद्रेवरती शिवतुला दानाचा कार्यक्रम पार पडला. या शिव तुलादानात शिवभक्त व अनेक सेवाभावी संस्था यांच्या वतीने शालेय उपयोगी वस्तू गोडधोड व अन्नछत्रासाठी लागणार्या पदार्थांची तुला करण्यात आली.
विशेष म्हणजे किल्ले रायगड परिसरात असणार्या गरजू विद्यार्थ्यांना तुला दानातील शालेय साहित्य तसेच तुला दानात झालेले गोडधोड व इतर पदार्थ हे राज्याभिषेक सोहळ्यासाठी आयोजित केलेल्या अन्नछत्रासाठी देण्यात आले. त्यानंतर झालेल्या पारंपारिक गोंधळात भंडारा उधळत आणि दिवट्या नाचवताना शिवभक्तांचा आनंद कोसळून वाहताना दिसले.
आज किल्ले रायगडवर प्रथम जिल्हा परिषद वस्तीगृह येथे ध्वज पूजन करून सकाळी सात वाजताच्या सुमारास पालखीचे प्रस्थान होणार आहे. त्याचप्रमाणे नगारखान्यासमोर असलेल्या भव्य ध्वजाचे ध्वजारोहण संपन्न होईल त्यानंतर मुख्य शिवराज्याभिषेक सोहळ्याला प्रारंभ होणार आहे. विशेषतः यावेळी रायगड पोलीस दलाकडून छत्रपती शिवाजी महाराजांना मानवंदना देण्यात येणार आहे.
या कार्यक्रमानंतर शाही शोभायात्रा निघणार असून छत्रपती शिवाजी महाराजांची पालखी ही जगदीश्वर मंदिराकडे प्रस्थान करेल या शोभायात्रेत पारंपारिक शिवकालीन पोशाख परिधान केलेले शिवभक्त मावळे तसेच विविध पारंपारिक वाद्य ढोल ताशे नगारे यांचा समावेश असणार आहे.
शिवराज्याभिषेक दिन सोहळा संपन्न झाल्यानंतर आयोजकांच्या वतीने गड स्वच्छतेचे मोहीम हाती घेतली जाणार आहे.
या सोहळ्यासाठी रायगड पोलीस दलाकडून चोख पोलीस बंदोबस्त ठेवण्यात आला असून सुमारे 2000 च्या आसपास पोलीस कर्मचारी या बंदोबस्तात तैनात करण्यात आले आहेत तसेच रायगड किल्ला पायथा परिसरात वाहतूक कोंडी व शिवभक्तांना गैरसोय होऊ नये यासाठी परिवहन विभागात मार्फत महाडच्या दिशेने येणार्या शिवभक्तांसाठी कोंझर तसेच निजामपूर मार्गे येणार्या वाहनांसाठी बांधणीचा माळ येथील वाहन तळापासून किल्ले रायगड पर्यंत शिवभक्तांसाठी मोफत बस सेवा ठेवण्यात आली आहे.
