Raigad Rain | रायगड जिल्ह्याला मोठा दिलासा: दमदार पावसामुळे धरणांमध्ये ८३% पाणीसाठा, १७ धरणे तुडुंब

रायगड : जिल्ह्यात जून महिन्यात झालेल्या समाधानकारक पावसामुळे रायगडकरांची पाण्याची चिंता मिटली आहे. जिल्ह्यातील एकूण २८ धरणांमध्ये सरासरी ८३.१९ टक्के पाणीसाठा जमा झाला असून, ही गेल्या वर्षीच्या तुलनेत अत्यंत दिलासादायक वाढ आहे. या पावसामुळे जिल्ह्यातील बहुतांश भागातील पाणीपुरवठा सुरळीत होण्यास मदत होणार आहे.

जून महिन्याच्या अखेरीस जिल्ह्यातील पाणीसाठ्याने समाधानकारक पातळी गाठली आहे. एकूण २८ धरणांपैकी तब्बल १७ धरणे १०० टक्के भरली आहेत, ज्यामुळे अनेक तालुक्यांना मोठा दिलासा मिळाला आहे.

१००% भरलेली धरणे : १७

७५% पेक्षा जास्त भरलेली धरणे : ३

५०% ते ७५% दरम्यान पाणीसाठा : ४

५०% पेक्षा कमी पाणीसाठा : ४

जिल्ह्यातील बहुतांश प्रमुख धरणे पूर्ण क्षमतेने भरली आहेत. यामध्ये मुरुड तालुक्यातील फणसाड, तळा तालुक्यातील वावा, रोहा तालुक्यातील सुतारवाडी, पेणमधील आंबेघर, सुधागडमधील कोंडगाव, म्हसळ्यातील पाभरे, महाडमधील वरंध आणि खालापूर तालुक्यातील भिलवले व कलोत मोकाशी धरणांचा समावेश आहे.

दुसरीकडे, अलिबाग तालुक्यातील श्रीगाव (३१%), कर्जत तालुक्यातील साळोख (४३%) आणि श्रीवर्धनमधील रानीवली (१७%) यांसारख्या काही धरणांमध्ये पाणीसाठा अद्याप कमी असून, आगामी काळात पावसामुळे त्यात वाढ होण्याची अपेक्षा आहे. एकंदरीत, जून महिन्यातील पावसाने रायगड जिल्ह्याला मोठा दिलासा दिला आहे. गेल्या वर्षीच्या तुलनेत यंदा पाणीसाठा समाधानकारक असल्याने आगामी काळात जिल्ह्यातील नागरिकांना आणि शेतकऱ्यांना पाण्याची उपलब्धता पुरेशी राहील, असा विश्वास व्यक्त केला जात आहे.