महाड : महाड वरंध पंढरपूर मार्गावर वरंध घाटामध्ये रस्त्याचे काम सुरू असताना निदर्शनास आलेल्या शिवलिंग सदृश्य जागेची मंत्री भरत गोगावले यांनी पाहणी केली. या संदर्भात शास्त्रीय दृष्टिकोनातून तपासणी करून त्याबाबतची व्यवस्था करू असे जाहीर केले.
महाड वरंध मार्गे पुण्याला जाणाऱ्या घाट रस्त्याचे काम प्रगतीपथावर असून या कामाचे रुंदीकरण माझेरी गावच्या हद्दीत सुरु असताना एका पावसाळ्यात पडणाऱ्या धबधब्या जवळ खोदकाम करत असताना जवळपास दहा ते पंधरा फूट आत गेल्यानंतर अचानक या ठिकाणी एका दगडाचा आकार हा शिवलिंग याप्रमाणे आणि त्याच्या चारी बाजूने पोकळ जागा असल्याने हे शिवलिंग असावं अशी धारणा माझेरी गाव, वरंध गाव त्याच पद्धतीने या घाटातून जाणाऱ्या प्रवाशांकडून व्यक्त केली जात आहे.
या ठिकाणी शिवभक्तांनी पूजा देखील सुरुवात केली आहे. आज राज्याचे रोजगार हमी योजना फलोत्पादन आणि खारभूमी विकास मंत्री भरत गोगावले हे आपल्या नियोजित पारमाची गावच्या पुनर्वसनाच्या कार्यक्रमाला गेल्यानंतर त्यांनी या शिवलिंग सदृश्य शिवलिंगाची पाहणी केली आहे.
यावेळी बोलत असताना गोगावले यांनी सांगितले की या दगडाचा आकार शिवपिंडी सारखा दिसत आहे, त्याच पद्धतीने ही शिवपिंड समोर आल्यानंतर या ठिकाणाहून दोन नाग बाहेर पडले असे या ठिकाणी खोदकाम करणाऱ्या ठेकेदारामार्फत सांगण्यात येत आहे. त्यामुळे या शिवपिंड सदृश्य शिवलिंगाची तपासणी करून पुढील व्यवस्था केली जाईल असे सांगितले.
यावेळी त्यांच्यासोबत त्यांच्या पत्नी सुषमा गोगावले, माजी जिल्हा परिषद सदस्य मनोज काळीजकर, महाड विधानसभा संपर्कप्रमुख राजेश देशमुख आदी उपस्थित होते.
