नागोठणे: नागोठणे शहर व परिसरात रात्रभर झालेल्या मुसळधार पावसामुळे रविवारी (५ जुलै) सकाळी साडेसहा वाजेच्या सुमारास नागोठणे-रोहा मार्गावरील भिसे खिंडीत, आमडोशी फाट्याजवळ एक मोठे झाड रस्त्यावर कोसळले. झाडासोबतच मातीचा मोठा ढिगारा रस्त्यावर आल्यामुळे या मार्गावरील दोन्ही बाजूंची वाहतूक पूर्णपणे ठप्प झाली आहे.
घटनेची माहिती मिळताच नागोठणे पोलीस ठाण्याचे सहाय्यक पोलीस निरीक्षक (सपोनि) रवींद्र पारखे यांनी सहकाऱ्यांसह तातडीने घटनास्थळी धाव घेतली. पोलिसांनी 'जेसीबी'च्या (JCB) साहाय्याने रस्त्यावरील झाड बाजूला करण्याचे आणि माती साफ करण्याचे काम युद्धपातळीवर सुरू केले आहे. थोड्याच वेळात हा रस्ता वाहतुकीसाठी पूर्णपणे मोकळा करण्यात येईल, अशी माहिती सपोनि रवींद्र पारखे यांनी दिली आहे.
दरम्यान, या संपूर्ण भिसे खिंडीत सध्या अनेक झाडे अत्यंत धोकादायक स्थितीत उभी आहेत. ही झाडे कधीही कोसळण्याची भीती असून, मोठी दुर्घटना घडण्यापूर्वी संबंधित खात्याने ही धोकादायक झाडे तातडीने बाजूला करावीत, अशी मागणी वाहनचालकांकडून केली जात आहे.
