विक्रम बाबर
पनवेल : पनवेल महानगरपालिकेच्या सार्वत्रिक निवडणुकीस आज (दि.15 जानेवारी) सकाळी ७.३० वाजल्यापासून शांततेत सुरुवात झाली. शहर व उपनगरांतील मतदान केंद्रांवर सकाळच्या सत्रात मतदारांची तुरळक उपस्थिती दिसून आली. पहिल्या दोन तासांत, म्हणजे सकाळी ७.३० ते ९.३० या कालावधीत केवळ ७.६१ टक्के मतदानाची नोंद झाली आहे. एकूण ५ लाख ५४ हजार ५७८ मतदारांपैकी फक्त ४२ हजार २२९ मतदारांनी आपला मतदानाचा हक्क बजावल्याने सुरुवातीच्या टप्प्यात मतदानाचा वेग मंद असल्याचे चित्र आहे.
शहरातील बहुतांश मतदान केंद्रांवर मतदान प्रक्रिया शांततेत सुरू असून कुठेही अनुचित प्रकार घडल्याची नोंद नाही. निवडणूक यंत्रणा, पोलीस प्रशासन आणि मतदान कर्मचारी सज्ज अवस्थेत कार्यरत असल्याचे दिसून आले. मात्र, काही ठिकाणी व्यवस्थापनातील त्रुटी समोर आल्या आहेत.
कामोठे प्रभाग क्रमांक १३ मधील राधाई स्कूल येथील मतदान केंद्रावर ज्येष्ठ नागरिकांना आणि दिव्यांग मतदारांना गैरसोयीचा सामना करावा लागल्याचे चित्र दिसून आले. पालिकेच्या वतीने ज्येष्ठ नागरिक व दिव्यांगांसाठी व्हीलचेअरची व्यवस्था करण्यात आली होती, मात्र त्या व्हीलचेअर ढकलण्यासाठी कर्मचारी उपलब्ध नसल्याने अडचण निर्माण झाली. परिणामी, काही ज्येष्ठ नागरिकांना आपल्या कुटुंबीयांच्या मदतीने व्हीलचेअर ढकलत मतदान केंद्र शोधावे लागले.
या परिस्थितीत तेथील पोलीस कर्मचारी काही ज्येष्ठ नागरिकांना मदत करताना दिसून आले. मात्र, अशा मूलभूत सुविधांमध्ये प्रशासनाकडून अधिक संवेदनशीलता आणि तत्काळ उपाययोजना अपेक्षित असल्याची भावना मतदारांमध्ये व्यक्त होत आहे. मतदान हा लोकशाहीचा महत्त्वाचा अधिकार असल्याने विशेषतः ज्येष्ठ नागरिक आणि दिव्यांग मतदारांना कोणताही त्रास होऊ नये, यासाठी यंत्रणेने अधिक दक्ष राहण्याची गरज आहे.
पोलीस कर्मचाऱ्यांसाठी दिलेले नाष्टा देखील निघाला खराब
कामोठे प्रभाग १२ मधील सुषमा पाटील विद्यालयात पोलीस बंदोबस्तासाठी असलेल्या कर्मचाऱ्यांना पोहा हा नाष्टा देण्यात आला होता. मात्र या पोह्याला वास मारत असल्याने अनेक कर्मचाऱ्यांना सकाळी नाष्टावीनाच बसण्याची वेळ आलेली आहे
