खांदा कॉलनी : पनवेल शहर आणि परिसरात पुन्हा एकदा हवेतील प्रदूषणाचे प्रमाण वाढू लागले आहे. वाढत्या प्रदूषणामुळे नागरिकांना श्वसनाचा त्रास जाणवू लागला असून आरोग्याचा प्रश्न ऐरणीवर आला आहे. महामार्गावरून दिवसरात्र हजारो वाहनांची ये-जा सुरू असते. अवजड वाहनांच्या वर्दळीमुळे रस्त्यावरील धूळ मोठ्या प्रमाणात हवेत पसरते.
त्यातच बांधकामे आणि रस्त्यांवरील धुळीमुळे प्रदूषणात भर पडत आहे. या पार्श्वभूमीवर पनवेल महानगरपालिकेने प्रदूषण नियंत्रणासाठी पुढाकार घेतला आहे. महामार्गालगत असलेल्या झाडांवर पाण्याची फवारणी करण्यास सुरुवात करण्यात आली आहे.
पाण्याच्या फवाऱ्यामुळे झाडांच्या पानांवर साचलेली धूळ खाली बसण्यास मदत होत आहे. तसेच हवेत तरंगणारे धूलिकणही काही प्रमाणात खाली बसण्यास मदत होऊ शकते. त्यामुळे परिसरातील हवेची गुणवत्ता सुधारण्यास हातभार लागेल, अशी अपेक्षा व्यक्त होत आहे. महामार्गालगत असलेल्या झाडांवर पाण्याची फवारणी केल्याने परिसरातील धुळीचे प्रमाण कमी होण्यास मदत होणार आहे.
प्रदूषणाचा वाढता विळखा लक्षात घेता महापालिकेने केलेला हा प्रयत्न महत्त्वपूर्ण मानला जात आहे. मात्र, शहरातील प्रदूषणाची समस्या केवळ झाडांवर पाणी मारून सुटणारी नाही. रस्त्यांवरील धूळ, वाहनांचा धूर आणि सुरू असलेली बांधकामे हीदेखील प्रदूषणाची प्रमुख कारणे आहेत. त्यामुळे या सर्व बाबींवर महापालिकेने लक्ष देणे आवश्यक आहे.
रस्त्यांची नियमित स्वच्छता करणे गरजेचे आहे. बांधकामाच्या ठिकाणी धूळ उडू नये यासाठी योग्य खबरदारी घेणे आवश्यक आहे. तसेच प्रदूषण नियंत्रणासाठी नियमित पाण्याची फवारणी करण्याची गरज आहे. हवेतील प्रदूषणामुळे लहान मुले, ज्येष्ठ नागरिक आणि श्वसनाचा त्रास असलेल्या व्यक्तींना अधिक त्रास सहन करावा लागत आहे. त्यामुळे महापालिकेच्या या उपक्रमाला सातत्य मिळणे अपेक्षित आहे.
प्रदूषणमुक्त आणि आरोग्यदायी वातावरणासाठी महापालिकेने दीर्घकालीन उपाययोजना कराव्यात, अशी अपेक्षा पनवेलकर व्यक्त करीत आहेत. आता महापालिकेचा हा उपक्रम कितपत प्रभावी ठरतो, हे पाहणे महत्त्वाचे ठरणार आहे.