खोपोली : ताकई - महड रस्त्यावरील खासगी जागेत अवैध गुटखा साठा असल्याची माहिती रिपब्लिकन सेनेच्या पदाधिकार्यांना मिळाल्यानंतर बुधवार 25 तारखेला रात्री दीड वाजण्याच्या सुमारास स्टिंग ऑपरेशन करीत अंदाजे लाख रुपयाचा गुटखा साठा पकडून दिला आहे. रिपब्लिकन सेना, अन्न व प्रशासन विभाग आणि खोपोली पोलिसांनी केलेल्या कारवाईमुळे गुटखा माफियांचे धाबे दणाणले आहे.
महाराष्ट्र शासनाने प्रतिबंधीत केलेला विमल पान मसाला व व्ही वन सुगंधीत तंबाखू मालाचा साठा व विक्री करण्यासाठी बंदी असतानाही खोपोलीसह खालापूर तालुक्यात पानटपरीवर गुटखा विक्री जोरात सुरू आहे. सदर अवैध गुटखासाठा ताकई - महड रस्त्यावरील खासगी जागेतील रूम आणि कंटेनरमध्ये करीत असल्याची गुप्त माहिती पॅन्थर आर्मी महाराष्ट्र अध्यक्ष रिपब्लिकन सेनेचे कर्जत तालुका अध्यक्ष सुशीलभाई जाधव, रिपब्लिकन सेना रायगड जिल्हा उपाध्यक्ष सुफियान मुकादम, जिल्हा महासचिव पंचशील शिरसाट, पँथर आर्मी रायगड जिल्हा उपाध्यक्ष आशिष सुरेश खंडागळे, आरिफ भाई राऊत यांनी बुधवारी रात्री दीडच्या सुमारास स्टिंग ऑपरेशन करीत घटनास्थळी पोहचले. गुटखा विक्री करणारे आरोपी फरार असून यांच्या विरोधात खोपोली पोलिस ठाण्यात गुन्हा दाखल करण्यात आला आहे.
