पुणे : पूर्ववैमनस्यातून 17 वर्षांच्या युवकावर तिघांनी कोयत्याने डोक्यात, पाठीवर वार करून हाताचा पंजा मनगटापासून वेगळा केला आहे. अभिषेक गणेश दोरास्वामी (वय 17, रा. हडपसर) असे जखमी झालेल्या युवकाचे नाव आहे. याबाबत त्याचे वडील गणेश राजन दोरास्वामी (वय 46, रा. शिवाजीनगर रेल्वे स्टेशनजवळ) यांनी शिवाजीनगर पोलिसांकडे फिर्याद दिली आहे.
त्यानुसार पोलिसांनी तीन अल्पवयीन मुलांवर खुनाचा प्रयत्न केल्याचा गुन्हा दाखल केला आहे. हा प्रकार शिवाजीनगर रेल्वे स्टेशनजवळील प्लॉट नं. 11 येथील सार्वजनिक स्वच्छतागृहाबाहेर बुधवारी (दि. 2) दुपारी पावणेतीन वाजता घडला.
पोलिसांनी दिलेल्या माहितीनुसार, फिर्यादी हे प्लॉट नंबर 11 येथे राहायला आहेत. त्यांचा मुलगा अभिषेक याचा यापूर्वी गल्लीतील मुलांबरोबर वाद झाला होता. त्यामुळे त्यांनी अभिषेकला हडपसर येथे राहायला ठेवले आहे. अभिषेक हा आपल्या आई-वडिलांकडे आला होता. बुधवारी दुपारी पावणेतीनच्या सुमारास तो सार्वजनिक शौचालयात गेला होता. हे तीन अल्पवयीन मुलांनी पाहिले. जुन्या वादाचा राग मनात धरून हे तिघे अल्पवयीन शौचालयाबाहेर दबा धरून बसले. तो बाहेर येताच त्याच्या डोक्यावर, पाठीवर, डाव्या हातावर कोयत्याने वार करून त्याला गंभीर जखमी केले. त्यांनी अभिषेकच्या डाव्या हातावर इतका जोरात वार केला की त्याचा पंजा मनगटापासून वेगळा झाला. संचेती हॉस्पिटलमध्ये अभिषेक याला दाखल करण्यात आले असून, त्यांच्यावर तेथे उपचार करण्यात येत आहेत. पोलिस उपनिरीक्षक अजित बडे तपास करीत आहेत.
