जेजुरी : महाराष्ट्राचे कुलदैवत श्री क्षेत्र खंडोबा देवाच्या दर्शनासाठी जेजुरी गडावर येणाऱ्या भाविकांसाठी दि. १० मार्च २०२५ पासून वस्त्रसंहिता लागू करण्याचा निर्णय देवसंस्थान ट्रस्टने घेतला आहे. तसेच त्यासाठी नियमावलीही जाहीर करण्यात आली आहे. दरम्यान, भाविकांनी या नियमांचे पालन करावे, असे आवाहन देवसंस्थानच्या वतीने करण्यात आले आहे.
या वेळी गडावर वस्त्रसंहिता फलकाचे अनावरण करण्यात आले. श्री मार्तंड देवसंस्थानचे प्रमुख विश्वस्त अभिजित देवकाते, विश्वस्त अॅड. पांडुरंग थोरवे, डॉ. राजेंद्र खेडेकर, व्यवस्थापक आशिष बाठे, सतीश घाडगे, सागर गोडसे आदी उपस्थित होते
महाराष्ट्राचे कुलदैवत खंडोबा मंदिरात दर्शनासाठी भारतीय वेशभूषा परिधान करणे आवश्यक असेल. भारतीय वेशभूषा असेल तरच भाविकांना प्रवेश मिळेल, असा निर्णय श्री मार्तंड देवसंस्थान, जेजुरीच्या विश्वस्त मंडळाच्या वतीने घेण्यात आला आहे. पुरुष व महिला भाविकांना मंदिरात कमी कपड्यांमध्ये प्रवेश मिळणार नाही, असेही स्पष्ट करण्यात आले आहे. फॅशन म्हणून वापरण्यात येणाऱ्या फाटक्या जीन्स, बरमुडा, शॉर्ट, स्कर्ट असा व तत्सम कपडे घालून देवदर्शनास गडावर येण्यास मज्जाव केला जाणार आहे.
याविषयी बोलताना श्री मार्तंड देवस्थानचे प्रमुख विश्वस्त अभिजित देवकाते म्हणाले, मंदिराचे पावित्र्य, शालीनता जपणारी वेशभूषा भाविकांकडून अपेक्षित आहे. गुडघ्याच्यावर असणारे किंवा आखूड- कमी कपडे अपेक्षित नाहीत. असे कपडे न घालण्याचे नम्र आवाहन सर्व विश्वस्त मंडळाच्या वतीने भाविकांना करण्यात येत आहे. महिला आणि पुरुष दोघांसाठी हे नियम सारखेच असणार आहेत. दरम्यान, दर्शनासाठी येताना भाविकांनी भारतीय पारंपरिक वेशभूषा करून यावे, असे आवाहनही श्री मार्तंड देवसंस्थानच्या वतीने करण्यात आले आहे.
