पुणे : देशभर गाजलेल्या पुण्यातील कल्याणीनगर पोर्शे अपघात प्रकरणात कारमध्ये मागे बसलेल्या एका अल्पवयीन मुलाचे रक्ताचे नमुने बदलल्याप्रकरणी दाखल असलेल्या गुन्ह्यात उच्च न्यायालयाने अटकपूर्व जामीन फेटाळल्यानंतर आता सर्वोच्च न्यायालयानेही आरोपीचा अटकपूर्व जामीन फेटाळून लावला आहे. या आरोपीच्या सांगण्यावर एकाने स्वतःच्या रक्ताचे नमुने दिले होते. जामीन फेटाळला गेल्यामुळे आरोपीची अटक आता निश्चित झाली आहे.
अरुणकुमार देवनाथ सिंग असे जामीन फेटाळण्यात आलेल्या आरोपीचे नाव आहे. गुन्हा दाखल झाल्यानंतर सिंग याने येथील जिल्हा न्यायालयात जामिनासाठी अर्ज केला होता. मात्र न्यायालयाने तो फेटाळला होता. त्यामुळे त्याने उच्च न्यायालयात अपील केले होते. सुरुवातीला त्याला अंतरिम जामीन मंजूर करण्यात आला होता. मात्र न्यायालयाने त्याचा जामीन दि.२३ ऑक्टोबरला फेटाळून लावला होता. उच्च न्यायालयाने दिलेल्या आदेशाविरोधात सिंग याने सर्वोच्च न्यायालयाचा दरवाजा ठोठवला होता. मात्र सर्वोच्च न्यायालयाने सिंग याला कोणत्याही प्रकारचा दिलासा न देता रक्त बदलण्याच्या प्रक्रीयेत सक्रीय सहभाग दिसत असल्याने जामीन फेटाळून लावल्याचे वरिष्ठ पोलिस अधिकार्यांनी सांगितले.
पोलिस आयुक्त अमितेश कुमार , अपर पोलिस आयुक्त शैलेश बलकवडे, उपायुक्त निखील पिंगळे यांच्या मागर्दशनात सहायक पोलिस आयुक्त गणेश इंगळे आणि त्यांच्या अधिकार्याकडून गुन्ह्याचा तपास करून आरोपपत्र तयार करण्याचे काम सुरू आहे.
कारचालक मुलाच्या दोन अल्पवयीन मित्रांना वाचविण्यासाठी या गुन्ह्यात यापूर्वी अटक करण्यात आलेले आरोपी यांनी ससूनच्या आपत्कालीन विभागाचा तत्कालीन मुख्य वैद्यकीय अधिकारी डॉ. श्रीहरी हाळनोर व न्यायवैद्यक विभागाचे प्रमुख डॉ. अजय तावरे यांना लाच दिली. त्यानंतर एका आरोपीने एका मुलाच्या रक्ताच्या नमुन्यांच्या जागी स्वतःच्या रक्ताचा नमुना दिला, तर आशिष नावाच्या आरोपीने अरुणकुमार सिंग याच्या सांगण्यावरून दुसर्या मुलाच्या जागी स्वतःचे रक्त दिल्याचे पोलिसांच्या तपासात उघड झाले आहे.
