खेड : मुख्यमंत्री निधीतून मंजूर झालेल्या ८ कोटी रुपयांच्या रस्त्याच्या कामावरून खेड तालुक्यातील जैदवाडी येथे मंगळवारी (दि. २९) मोठा तणाव निर्माण झाला. रस्त्याचे काम आमच्या जमिनीतून जात असल्याचा दावा करत ५० हून अधिक नागरिकांच्या जमावाने थेट कामाच्या ठिकाणी धाव घेत दगडफेक आणि वाहनांची तोडफोड केली. या घटनेत सरपंच पती जखमी झाले असून, प्रकरण पोलीस ठाण्यापर्यंत पोहोचले. पोलिसांनी वेळीच हस्तक्षेप करून परिस्थिती नियंत्रणात आणली.
खेड आणि आंबेगाव तालुक्याच्या सीमेवर असलेल्या जैदवाडी येथे मुख्यमंत्री ग्रामसडक योजनेअंतर्गत ८ कोटी रुपये खर्चाच्या सिमेंट काँक्रिट रस्त्याच्या कामाला सुरुवात झाली होती. ठेकेदार इंद्रजीत नाईकरे हे जैदवाडी ग्रामपंचायतीच्या सहकार्याने काम करत होते.
मंगळवारी माळेगाव हद्दीत काम सुरू असताना, अचानक ५० हून अधिक स्थानिक आदिवासी नागरिक आणि महिलांनी घटनास्थळी धाव घेतली.
कामास विरोध : ‘हा रस्ता आमच्या मालकीच्या जमिनीतून जात असून, त्यावर काम करू देणार नाही,’ असा आक्रमक पवित्रा घेत जमावाने कामात अडथळा आणला.
दगडफेक आणि हल्ला : काही वेळातच परिस्थिती चिघळली. जमावाने कामासाठी वापरल्या जाणाऱ्या वाहनांवर दगडफेक सुरू केली. यावेळी उपस्थित असलेले सरपंच शीतल जैद यांचे पती विकास जैद, उपसरपंच कैलास जैद आणि इतर ग्रामस्थांवरही हल्ला करण्याचा प्रयत्न झाला.
सरपंच पती जखमी : या दगडफेकीत एक दगड विकास जैद यांच्या हाताला लागल्याने ते जखमी झाले.
यावेळी घटनास्थळी माजी सरपंच बाळासाहेब जैद, सदस्य बबन गावडे, विजय जैद यांच्यासह अनेक ग्रामस्थ उपस्थित होते.
घटनेनंतर दोन्ही गट तक्रार देण्यासाठी खेड पोलीस ठाण्यात दाखल झाले. मात्र, पोलीस ठाण्याच्या आवारातही दोन्ही गटांमध्ये पुन्हा शाब्दिक चकमक उडाल्याने काही काळ तणाव निर्माण झाला.
यावेळी पोलीस अधिकारी संतोष घोलप आणि बांडे यांनी दोन्ही बाजूंचे म्हणणे शांतपणे ऐकून घेतले आणि सर्वांना शांत केले. पोलीस निरीक्षक सुभाष चव्हाण यांनी दोन्ही गटांना कायदेशीर भूमिकेची जाणीव करून दिली. त्यांनी विरोध करणाऱ्या ग्रामस्थांना स्पष्टपणे सांगितले की, ‘हे शासकीय काम असून त्यात अडथळा आणणे हा गुन्हा आहे. तुमच्या जमिनीबद्दल काही तक्रारी असतील, तर वादविवाद न करता कायदेशीर मार्गाने न्यायालयात दाद मागा.’
पोलिसांनी समज दिल्यानंतर अखेर दोन्ही गट शांत झाले.
हा ग्रामीण मार्ग यापूर्वी जिल्हा परिषदेच्या निधीतून दोन वेळा डांबरीकरण करून तयार करण्यात आला होता.
आता मुख्यमंत्री निधीतून त्याचे सिमेंट काँक्रिटीकरण करून मजबुतीकरण केले जात आहे.
हा जुनाच रस्ता असून, केवळ त्याचे नूतनीकरण होत असल्याचे जैदवाडी ग्रामस्थांचे म्हणणे आहे.
पोलिसांच्या यशस्वी मध्यस्थीनंतर रस्त्याचे काम पुन्हा सुरू झाले आहे, अशी माहिती विकास जैद यांनी दिली. या घटनेमुळे विकासकामांमध्ये येणारे स्थानिक अडथळे आणि जमिनीच्या वादाचा प्रश्न पुन्हा एकदा समोर आला आहे. सध्या परिस्थिती नियंत्रणात असली तरी, भविष्यात हा वाद पुन्हा उफाळून येऊ नये यासाठी प्रशासनाला लक्ष ठेवावे लागणार आहे.
