नारायणगाव : तुम्ही वारंवार बहिणीकडे राहायला का जाता? हा राग मनात धरून जन्मदात्या बापाला मुलाने लाथा बुक्क्यांनी मारहाण करून गंभीर जखमी केले. त्यानंतर उपचारादरम्यान पित्याचा मृत्यू झाला. ज्ञानेश्वर नाथा खंडागळे (वय ५५, रा. मांजरवाडी, ता. जुन्नर) असा त्यांचे नाव आहे. गणेश (वय ३८) असे मुलाचे नाव असून, त्याला पोलिसांनी बुधवारी (दि. १६) अटक केली.
मांजरवाडी येथे ज्ञानेश्वर खंडागळे यांना मुलगा गणेश याने बुधवारी (दि. १६) 'तुम्ही बहिणीकडे का जाता' असे म्हणून शिवीगाळ व दमदाटी करून त्यांना खाली पाडून छाती, पोट आणि डोक्यावर जोरजोरात लाथा मारून गंभीर जखमी केले. बाजूच्या एका व्यक्तीने याबाबतची माहिती नारायणगाव पोलिस ठाण्याला फोनवरून दिली. घटनेचे गांभीर्य ओळखून तातडीने पोलिस घटनास्थळी दाखल झाले. ज्ञानेश्वर खंडागळे गंभीर जखमी झाल्याने त्यांना तातडीने पोलिसांनी नारायणगाव येथील खासगी रुग्णालयात उपचारासाठी दाखल केले व पोलिस जवान आनंदा चौगुले यांनी याबाबतची फिर्याद नारायणगाव पोलिस ठाण्यात दाखल केली. दरम्यान, ज्ञानेश्वर नाथा खंडागळे यांचा पुणे येथे उपचारादरम्यान गुरुवारी (दि. १७) मृत्यू झाला.
वडिलांच्या मृत्यूस कारणीभूत झालेल्या माथेफिरू मुलास पोलिसांनी तत्काळ अटक केली असून, याबाबतचा पुढील तपास उपविभागीय पोलिस अधिकारी रवींद्र चौधर यांच्या मार्गदर्शनाखाली सहायक पोलिस निरीक्षक महादेव शेलार करीत आहेत.
