सुपे: मागील तीन महिन्यांपासून थाळनेर (जि. धुळे) येथून बेपत्ता असलेल्या पित्याची सोशल मीडियाच्या माध्यमातून त्यांच्या मुलासोबत भेट सूपे (ता. बारामती) येथे घडून आली. संतोष शिरसाट (वय 65) असे या पित्याचे नाव आहे.
याबाबतचे वृत्त असे की, संतोष शिरसाट हे मागील आठवड्यापासून गावात फिरत होते. त्यांच्या अंगावर मळके कपडे तसेच दाढी आणि केस वाढलेले होते. ते हॉटेल श्वेता येथे आले. या वेळी हॉटेलमालक ओंकर इंगळे आणि तेथे असणारे अमोल धेंडे यांनी त्यांना नाव-पत्ता विचारण्याचा प्रयत्न केला. त्यांनी स्वत:चे नाव संतोष शिरसाट सांगून थाळनेर येथील असल्याचे संगितले. मात्र, त्यांना थाळनेर कुठे आहे? हे सांगता येत नव्हते. (Latest Pune News)
या वेळी अमोल याला डीजे बँडची आवड असल्याने थाळनेर डीजे बँड ही इन्स्टाग्रामवर पोस्ट केली. त्या वेळी थाळनेर हे धुळे जिल्ह्यात असल्याची माहिती समजली. त्यानंतर डीजे बँडमालकाचा मोबाईल शोधून थाळनेरच्या सरपंचाला फोन केला. या वेळी सरपंचाने थाळनेर गावात शिरसाट आडनावाची एक हजार कुटुंबे राहत असल्याचे सांगितले.
पण, काही वेळात सरपंचाने माहिती घेऊन त्यांच्या मुलाचा मोबाईल नंबर धेंडे यांना शोधून दिला. त्यानंतर मुकेश शिरसाट यांच्याशी संपर्क करून तुझे वडील सुप्यात असून, तू लवकर ये, असे सांगितले. त्यांचा मुलगा मुकेश आल्यावर वडिलांना कुटुंबाच्या स्वाधीन केले. मुलगा सुप्यात येईपर्यंत धेंडे यांनी त्यांच्या वडिलांचे वाढलेले केस आणि दाढी केली.
अमोलने या सर्व घाडामोडी सोशल मीडियाच्या माध्यमातून शेअर केल्याने संतोष शिरसाट यांच्या कुटुंबाचा शोध लागला अन् त्या पिता-पुत्राची भेट झाली. सोशल मीडियाचा किती चांगल्या प्रकारे वापर होतो, याचा चांगला अनुभव आल्याचे धेंडे यांनी सांगितले.
