सोमेश्वरनगर: सोमेश्वर सहकारी साखर कारखाना शुक्रवारी (दि. 28) एफआरपीची उर्वरित रक्कम 373 रुपये प्रतिटनाप्रमाणे सभासदांच्या खात्यावर वर्ग करणार असल्याची माहिती सोमेश्वर कारखान्याचे अध्यक्ष पुरुषोत्तम जगताप यांनी दिली. सोमेश्वरची एकूण एफआरपी 3 हजार 173 रुपये प्रतिटन असून, ती जिल्ह्यात उच्चांकी आहे.
कारखान्याने याअगोदर 2 हजार 800 रुपये प्रतिटन इतकी पहिली उचल सभासदांच्या खात्यावर वर्ग केली आहे. शुक्रवारी सभासदांच्या खात्यावर 37 कोटी 17 लाख रुपये वर्ग करणार असल्याचे जगताप यांनी सांगितले. 16 ते 25 मार्चदरम्यान गाळप झालेल्या ऊसापोटी सोसायट्यांना साडेसहा कोटी रक्कम वर्ग करणार असल्याचे त्यांनी सांगितले. सहकारी सोसायट्यांनी सोमेश्वर कारखान्याकडे आवश्यक असलेल्या रकमांची यादी पाठवली आहे.
शुक्रवारी पैसे जमा होणार असल्याने अनेकांना पुढील दोन दिवसांत सोसायटी आणि बँकांचे कर्ज भरता येणार आहे. यामुळे सभासदांना दिलासा मिळाला आहे. उच्च न्यायालयाच्या निर्णयाचा आदर करत सोमेश्वर कारखान्याच्या संचालक मंडळाने केंद्र सरकारच्या सूत्रानुसार एकरकमी एफआरपी देण्याचा निर्णय घेतला आहे.
मार्च महिना संपायला अवघे दोन दिवस शिल्लक असताना सोमेश्वर कारखान्याने घेतलेल्या या निर्णयामुळे शेतकरी सभासदांना कर्जफेड, शेतीभांडवल, शिक्षण यासाठी मदत मिळणार आहे. मार्च महिनाअखेरीस सोमेश्वर कारखान्याचा गाळप हंगाम संपणार असल्याचेही जगताप यांनी सांगितले. सोमेश्वर कारखान्याने आत्तापर्यंत 12 लाख गाळपाचा टप्पा ओलांडला आहे. सव्वाबारा लाख टन ऊस गाळप होण्याचा अंदाज कारखाना प्रशासनाने व्यक्त केला आहे.
