Pune Female Lawyer Extortion Case
पुणे: चंदगड येथील एका व्यक्तीवर अत्याचाराचा प्रयत्न करून, फोटो व्हायरल करण्याची धमकी देत दोन लाखाची खंडणी मागणाऱ्या महिलेवर मुंढवा पोलिस ठाण्यात गुन्हा दाखल करण्यात आला आहे. यापुर्वी या महिलेवर कोथरुड पोलिस ठाण्यात खंडणीचा गुन्हा दाखल आहे.
याप्रकरणी, मुंढवा येथील 37 वर्षीय व्यक्तीने मुंढवा पोलिस ठाण्यात फिर्याद दिली आहे. त्यानुसार संबंधीत 38 वर्षीय महिलेवर गुन्हा दाखल करण्यात आला आहे. हा प्रकार 15 सप्टेंबर ते 1 डिसेंबर 2025 दरम्यानच्या कालावधीत बीटी कवडे रोड घोरपडी येथे घडला आहे.
पोलिसांनी दिलेल्या माहितीनुसार, फिर्यादी तरुणासोबत या महिलेने ओळख वाढविली. त्या हायकोर्टात वकील असल्याचे सांगून फिर्यादीवर त्यांच्या पत्नीने दाखल केलेल्या केसेसमध्ये मदत करते, असे सांगून जवळीक साधली.
फिर्यादी यांनी लग्नास नकार दिला म्हणून फिर्यादी व त्यांच्या आईला कॉल करुन अश्लिल शिवीगाळ केली. तू माझ्या सोबत लग्न कर अथवा मला २ लाख रुपये दे, नाहीतर मी तुझ्यावर बलात्काराचा गुन्हा दाखल करते, म्हणून धमकी दिल्याचे फिर्यादी यांनी म्हटले आहे.
दरम्यान, हा प्रकार घडल्यानंतर फिर्यादीने याबाबत मुंढवा पोलिस ठाण्यात तक्रार दिली होती. त्यानुसार पोलिसांनी आरोपी महिलेवर खंडणीचा गुन्हा दाखल केला असून सहायक पोलीस निरीक्षक राजू महानोर तपास करीत आहेत.
