शंकर कवडे
पुणे: राजस्थान येथून येणार्या लालचुटूक गाजराचा हंगाम अंतिम टप्प्यात आल्याने बाजारात गाजराची आवक घटली आहे. सध्यस्थितीत बाजारात अवघ्या एक ते दोन ट्रकमधून गाजर दाखल होत आहेत. त्यातुलनेत, मागणी जास्त असल्याने गाजरच्या दरात दहा टक्क्यांनी वाढ झाली आहे. मागील काही दिवसांमध्ये फ्लॉवरच्या दरात मोठी घसरण झाली होती.
त्यामधून, खर्चही निघत नसल्याने शेतकर्यांनी फ्लॉवरची कमी प्रमाणात तोड केली. परिणामी, रविवारी बाजारात आवक घटल्याचे दिसून आले. स्थानिक मटारचा हंगाम संपत आला आहे. परराज्यातूनही मटारची आवकही मोठ्या प्रमाणात घटली आहे. बाजारात होत असलेल्या मागणीच्या तुलनेत फ्लॉवर व मटारची आवक कमी पडल्याने त्यांच्या दरात दहा टक्क्यांनी वाढ झाल्याचे दिसून आले.
उन्हाळी भुईमूग शेंगांचा हंगाम सुरू झाल्याने बाजारात कर्नाटक येथून भुईमूग शेंगासह तोतापुरी कैरीची आवक मोठ्या प्रमाणात होत आहे. याखेरीज, परराज्यासह स्थानिक भागातून शेवगा व हिरवी मिरचीची आवक वाढल्याने त्यांच्या दरात दहा टक्क्यांनी घसरण झाल्याचे सांगण्यात आले.
कृषी उत्पन्न बाजार समितीच्या गुलटेकडी मार्केट यार्डात रविवारी राज्यासह परराज्यातून सुमारे 90 ट्रकमधून शेतमालाची आवक झाली. गतआठवड्याच्या तुलनेत फळभाज्यांची आवक स्थिर राहिली. उर्वरित सर्व फळभाज्यांची आवक-जावक कायम राहिल्याने दर गत आठवड्याच्या तुलनेत टिकून होते.
परराज्यांतून झालेल्या आवकमध्ये मध्यप्रदेश, उत्तर प्रदेश आणि आंध्र प्रदेश येथून हिरवी मिरची सुमारे 18 ते 20 टेम्पो, कर्नाटक व गुजरात येथून कोबी 3 ते 4 टेम्पो, आंध्र प्रदेश व तामिळनाडू येथून शेवगा 2 टेम्पो, कर्नाटक येथून घेवडा 3 ते 4 टेम्पो, राजस्थान येथून 1 ते 2 ट्रक गाजर, कर्नाटक येथून 2 टेम्पो भुईमूग शेंग, हिमाचल प्रदेश 2 ट्रक मटार, आंध्र प्रदेश, कर्नाटक व तामिळनाडू येथून 7 ते 8 टेम्पो तोतापुरी कैरी, मध्यप्रदेश येथून लसणाची सुमारे 8 ते 10 टेम्पो आवक झाली होती.
स्थानिक भागातून झालेल्या आवकमध्ये सातारी आले सुमारे 550 ते 600 गोणी, भेंडी 7 ते 8 टेम्पो, गवार 4 ते 5 टेम्पो, टोमॅटो 8 ते 10 हजार पेटी, हिरवी मिरची 4 ते 5 टेम्पो, काकडी 7 ते 8 टेम्पो, फ्लॉवर 8 ते 10 टेम्पो, कोबी 5 ते 6 टेम्पो, ढोबळी मिरची 8 ते 10 टेम्पो, शेवगा 3 ते 4 टेम्पो, मटार 500 ते 600 गोणी, तांबडा भोपळा 8 ते 10 टेम्पो, कांदा सुमारे 50 ते 60 ट्रक, इंदौर, आग्रा, स्थानिक भागातून बटाटा 30 के 35 टेम्पो इतकी आवक झाली.
पालेभाज्यांचे भाव ‘जैसे थे’
उन्हाच्या चटक्याने पालेभाज्यांच्या दर्जावर परिणाम होत आहे. परिणामी, बाजारात दर्जेदार पालेभाज्यांचे गत आठवड्यातील चढे दर कायम आहेत. मार्केट यार्डातील तरकारी विभागात मागणी आणि पुरवठा यातील समतोलामुळे उर्वरित पालेभाज्यांचे भावही स्थिर असल्याची माहिती व्यापार्यांनी दिली.
येथील घाऊक बाजारात कोथिंबिरीची सुमारे सव्वा लाख जुडी आवक झाली. तर, मेथीची 50 हजार जुडीची आवक झाली. गतआठवड्याच्या तुलनेत कोथिंबीरीची आवक 35 हजार तर मेथीची आवक 10 हजार जुड्यांनी वाढली. घाऊक बाजारात सर्व प्रकारच्या जुडीचे भाव 15 रुपयांच्या आत आहेत. किरकोळ बाजारात एका गड्डीची 5 ते 20 रुपयांना विक्री करण्यात येत आहे.
