पुणे: चहापासून भाजीपर्यंत वापरल्या जाणार्या आल्याच्या नवीन हंगाम सुरू झाला आहे. गुलटेकडी मार्केट यार्डातील तरकारी विभागात पुणे विभागातून दररोज 40 ते 50 गोणी आले दाखल होऊ लागले आहे. बाजारात दाखल होत असलेल्या मालाच्या तुलनेत मागणी कमी पडल्याने त्याच्या भावात दहा टक्क्यांनी घसरण झाली आहे. रविवारी (दि. 23) घाऊक बाजारात आल्याच्या किलोला 250 ते 280 रुपये भाव मिळाला. तर, किरकोळ बाजारात 60 ते 80 रुपये किलो दराने आल्याची विक्री सुरू आहे.
ढगाळ हवामानामुळे पोषक वातावरण तयार झाल्याने फ्लॉवरची वाढलेली आवक कायम आहे. याखेरीज, स्थानिक शेवग्याचा हंगाम सुरू झाल्याने बाजारात पुणे विभागातून शेवगा मोठ्या प्रमाणात दाखल होत आहे. परिणामी, त्यांच्यासह ढोबळी मिरची व भुईमूग शेंगेच्या भावातही दहा टक्क्यांनी घसरण झाली आहे. बाजारात राज्यासह परराज्यातून हिरव्या मिरचीची आवक मोठ्या प्रमाणात होत आहे.
रमजानचा महिना सुरू असल्याने मिरचीला मागणीही मोठी असल्याने त्याचे भाव दहा टक्क्यांनी वधारल्याचे सांगण्यात आले. तरकारी विभागात रविवारी (दि. 23) 90 ट्रकमधून शेतमालाची आवक झाली. गतआठवड्याच्या तुलनेत फळभाज्यांची आवक दहा ट्रकने घटली. मागणी आणि पुरवठा यातील समतोलामुळे उर्वरित सर्व फळभाज्यांचे भाव मागील आठवड्याच्या तुलनेत स्थिर असल्याचे सांगण्यात आले.
परराज्यांतून झालेल्या आवकमध्ये कर्नाटक, गुजरात आणि आंध्र प्रदेश येथून हिरवी मिरची सुमारे 7 ते 8 टेम्पो, कर्नाटक आणि गुजरात येथून कोबी 4 ते 5 टेम्पो, कर्नाटक येथून घेवडा 2 ते 4 टेम्पो, राजस्थान येथून 5 ते 6 ट्रक गाजर, कर्नाटक येथून 2 ते 3 टेम्पो भुईमुग शेंग, हिमाचल प्रदेश 1 ट्रक मटार, आंध्र प्रदेश, कर्नाटक व तामिळनाडू येथून 5 ते 6 टेम्पो तोतापुरी कैरी, मध्यप्रदेश येथून लसणाची सुमारे 10 टेम्पो आवक झाली होती.
स्थानिक भागातून झालेल्या आवकमध्ये सातारी आले सुमारे 550 ते 600 गोणी, भेंडी 6 ते 7 टेम्पो, गवार 2 ते 3 टेम्पो, टोमॅटो 8 ते 10 हजार पेटी, हिरवी मिरची 3 ते 4 टेम्पो, काकडी 10 ते 12 टेम्पो, फ्लॉवर 10 ते 12 टेम्पो, कोबी 7 ते 8 टेम्पो, ढोबळी मिरची 10 ते 12 टेम्पो, शेवगा 5 ते 6 टेम्पो, मटार 700 ते 800 गोणी, तांबडा भोपळा 10 ते 12 टेम्पो, कांदा सुमारे 100 ट्रक, इंदौर, आग्रा, स्थानिक भागातून बटाटा 60 ते 65 टेम्पो इतकी आवक झाली.
कोथिंबीर, मेथी, शेपू महाग
मार्केट यार्डात कोथिंबीर, मेथीसह शेपूची आवक घटली आहे. त्यातुलनेत मागणी जास्त असल्याने कोथिंबिरीच्या भावात जुडीमागे तीन रुपये, मेथी सहा ते सात रुपये तर शेपू दोन रुपयांनी महागले आहेत. मागणी आणि पुरवठा यातील समतोलामुळे उर्वरित पालेभाज्यांचे भाव स्थिर असल्याची माहिती व्यापार्यांनी दिली. येथील घाऊक बाजारात कोथिंबिरीची सुमारे 90 हजार जुडी आवक झाली. तर, मेथीची 40 हजार जुडीची आवक झाली. गतआठवड्याच्या तुलनेत कोथिंबीरीची आवक दहा हजार तर मेथीची आवक वीस हजार जुड्यांनी घटली. घाऊक बाजारात सर्व प्रकारच्या जुडीचे भाव 15 रुपयांच्या आत आहेत.
