पुणे: शहरातील अनेक भागांत गुरुवारी जी अतिवृष्टी झाली, त्याचा सर्वांत वेगवान अंदाज अन् पावसाची आकडेवारी आशय मेजरमेंट या खासगी कंपनीने दिली आहे. महापालिका क्षेत्रात पडणाऱ्या अतिवृष्टीची माहिती देण्यासाठी महापालिकेने शंतनू पेंढारकर यांच्या कंपनीशी हा करार केला आहे.
त्यानंतर पाऊस थांबताच पंधरा मिनिटांत वीस केंद्रांवरची एकूण पावसाची आकडेवारी वेगाने दिली. पुणे हवामान वेधशाळेची शहरात आठ केंद्र आहेत. मात्र, तेथील पावसाची आकडेवारी येण्यास वेळ लागतो. तसेच, शहरात पावसाचे जे हॉटस्पॉट आहेत अशा ठिकाणचा पावसाचा डेटा तत्काळ मिळण्यासाठी हा करार करण्यात आला आहे.
शहरात कुठे किती पाऊस झाला? याचा अंदाज घेणे अवघड जात होते. त्यामुळे 2013 मध्ये महापालिकेने हा करार केला. तेव्हापासून अतिवृष्टीची माहिती ही कंपनी देत आहे. गुरुवारी शहरात झालेल्या अतिवृष्टीचा अलर्ट त्यांनी एक तास आधी दिला होता.
याबाबत कंपनीचे संचालक शंतनू पेंढारकर यांच्याशी संपर्क साधला असता त्यांनी सांगितले की, हवामानबदल या विषयावर आम्ही गेल्या अनेक वर्षांपासून काम करीत आहोत. फळे, पालेभाज्या आणि पिके याबाबत माहिती देत असतो. शहराच्या पावसाचा डेटा आशय मेजरमेंट वेदर डिव्हिजनद्वारे दिला जातो.
आमची 20 आटोमेटिक वेदर स्टेशन तो तत्काळ नोंदवतात. शहरात गुरुवारी 2 एप्रिल रोजी झालेला अतिवृष्टीचा डेटा देखील आम्ही दिला. यात सर्वाधिक पाऊस, वाऱ्याचा वेग, दिशा, हवेचा दाब कोणत्या भागात किती होता? याची माहिती दिली.
