Pune Dams Status: धरणसाखळीत 72 टक्के पाणीसाठा; दोन दिवसांत अर्धा टीएमसीची भर

खडकवासला: पानशेत, वरसगाव खोर्‍यात पुन्हा हलका पाऊस सुरू झाल्यामुळे खडकवासला धरणसाखळीत गेल्या दोन दिवसांत अर्धा टीएमसीहून अधिक पाण्याची भर पडली. साखळीतील सर्वांत मोठ्या वरसगाव धरणात 76 टक्क्यांहून अधिक पाणीसाठा झाला आहे. तसेच धरणसाखळीत रविवारी सायंकाळी पाच वाजेपर्यंत 21.11 टीएमसी म्हणजे 72.41 टक्के पाणीसाठा झाला होता.

धरण साखळीत शुक्रवारी (11) 20.57 टीएमसी पाणी होते. खडकवासला धरण क्षेत्रात पावसाची उघडीप आहे. मात्र टेमघरसह पानशेत-वरसगाव खोर्‍यात रिमझिम पाऊस पडत आहे. खडकवासला धरणात पाण्याची सध्या आवक मंदावली आहे.  (Latest Pune News)

पुणे शहर व परिसराला पिण्यासाठी मुबलक प्रमाणात पाणी सोडूनही पाण्याची तूट भरून निघत आहे. धरणातून मुठा नदीत पाणी सोडणे बंद केले आहे. धरणातील पाण्याची पातळी 59.59 टक्क्यांवर आहे.

रविवारी दिवसभरात टेमघर धरण परिसरात 6, वरसगाव येथे 4 आणि पानशेत धरण परिसरात 5 मिलीमीटर पाऊस पडला. खडकवासला धरण क्षेत्रात पावसाची नोंद झाली नाही.

खडकवासला धरणसाखळी एकूण पाणी साठवणक्षमता 29.15 टीएमसी

रविवारचा पाणीसाठा 21.11 टीएमसी (72.51 टक्के)