पुणे: बँकेत गोंधळ घालून कर्मचारी, तसेच व्यवस्थापकाला शिवीगाळ केल्याची घटना भवानी पेठ परिसरात घडली. याप्रकरणी खडक पोलिसांकडून दोघांविरुद्ध गुन्हा दाखल करण्यात आला.
राहुल राजू वाघरेशा (वय 28), राजू वाघरेशा (वय 58, दोघे रा. गोमराज व्हिला, गुलटेकडी) यांच्याविरुद्ध गुन्हा दाखल केला आहे. याबाबत बँक व्यवस्थापक श्रीआंश श्रीदेव सिंग (वय 39, रा. रॉयल एनरिच सोसायटी, भोसले गार्डन, हडपसर) यांनी खडक पोलिस ठाण्यात फिर्याद दिली आहे. त्यांनी दिलेल्या फिर्यादीनुसार, शासकीय कामात अडथळा आणणे, तसेच धक्काबुक्की केल्याप्रकरणी गुन्हा दाखल केला आहे.
पोलिसांनी दिलेल्या माहितीनुसार, फिर्यादी हे भवानी पेठेतील कल्पतरू प्लाझा येथील एका राष्ट्रीयकृत बँकेत व्यवस्थापक आहेत. आरोपी सोमवारी (दि. 13 एप्रिल) दुपारी दीडच्या सुमारास बँकेत आले. बँकेतील कर्मचाऱ्यांना त्यांना शिवीगाळ केली.
सिंग यांनी या घटनेची माहिती बँकेतील सुरक्षारक्षक सोमनाथ जगताप यांना दिली. आरोपींनी सुरक्षारक्षक जगताप यांना धक्काबुक्की करून जीवे मारण्याची धमकी दिली, असे सिंग यांनी फिर्यादीत म्हटले आहे.
वरिष्ठ पोलिस निरीक्षक शशिकांत चव्हाण, गुन्हे शाखेच्या पोलिस निरीक्षक शर्मिला सुतार यांनी घटनास्थळी तातडीने भेट दिली. पोलिस उपनिरीक्षक दाढे तपास करत आहेत. पोलिसांनी बँकेतील सीसीटीव्ही चित्रीकरण तपासले आहे.
