पिंपरी : लग्नाला अवघे तीन महिने झाले असतानाच, एका भरधाव कंटेनरने तरुणाला चिरडल्याची हृदयद्रावक घटना घडली आहे. खेड तालुक्यातील खालुंब्रे गावच्या हद्दीत रविवारी (दि. १४) सकाळी झालेल्या या भीषण अपघातात दुचाकीवर मागे बसलेल्या तरुणाचा जागीच मृत्यू झाला, तर दुचाकी चालवणारा त्याचा मित्र गंभीर जखमी झाला आहे.
गजानन बाबुराव बोळकेकर (वय २६, रा. नांदेड) असे मृत्यू झालेल्या तरुणाचे नाव आहे. तर, दुचाकीस्वार आदित्य गजाननराव गायकवाड (वय २३, रा. येलवाडी, खेड) हा गंभीर जखमी झाला असून, त्याच्यावर रुग्णालयात उपचार सुरू आहेत. याप्रकरणी महाळुंगे पोलिसांनी कंटेनर चालक मोहम्मद अरमान कमरुद्दीन खान (वय ३०, रा. धारावी, मुंबई) याला अटक केली आहे.
पोलिसांनी दिलेल्या माहितीनुसार, हा अपघात रविवारी सकाळी पावणेसातच्या सुमारास घडला. आरोपी कंटेनर चालक आपले वाहन बेदरकारपणे आणि भरधाव वेगात चालवत होता. रस्त्याच्या परिस्थितीकडे दुर्लक्ष करून ओव्हरटेक करण्याच्या प्रयत्नात त्याने आदित्य गायकवाड यांच्या स्प्लेंडर दुचाकीला जोरदार धडक दिली. ही धडक इतकी भीषण होती की, दुचाकीवर मागे बसलेले गजानन बोळकेकर खाली फेकले गेले आणि कंटेनरच्या मागील चाकाखाली आल्याने त्यांचा जागीच मृत्यू झाला.
मृत गजानन बोळकेकर हे महाळुंगे परिसरातील एका नामांकित कंपनीत मानव संसाधन (HR) विभागात नोकरीला होते. अवघ्या तीन महिन्यांपूर्वीच त्यांचे लग्न झाले होते. त्यांच्या अकाली निधनाने कुटुंबावर दुःखाचा डोंगर कोसळला असून, त्यांच्या सहकाऱ्यांमध्येही हळहळ व्यक्त होत आहे. महाळुंगे पोलिसांनी कंटेनर चालकाविरोधात गुन्हा दाखल केला असून, पुढील तपास सुरू आहे.
