पुणे : महापालिकेने स्वतःच्या नियमांना हरताळ फासत भरपावसाळ्यात पथ विभागामार्फत पुणे पोलिसांना सीसीटीव्ही केबल टाकण्यासाठी पेठ परिसरात खोदाईची परवानगी दिली होती. मात्र, या परवानगीचा गैरवापर करीत पोलिसांनी संपूर्ण शहरात मनमानी पद्धतीने खोदाई सुरू केली आहे. या कामातील त्रुटी दाखविणाऱ्या व्यक्तीवरच गुन्हा दाखल केल्याची धक्कादायक घटना घडली असून, पोलिसांची ही दादागिरी थांबवणार कोण? असा सवाल उपस्थित होत आहे. (Latest Pune News)
महापालिकेच्या पथ विभागाकडून शहरातील विविध शासकीय, निमशासकीय आणि खासगी संस्थांना सशुल्क खोदाई परवानगी दिली जाते. नियमांनुसार दरवर्षी 1 ऑक्टोबर ते 31 एप्रिल या कालावधीतच खोदाईसाठी परवानगी दिली जाते. त्यानंतर 1 मे ते 31 मे या काळात रस्त्यांची दुरुस्ती करणे बंधनकारक असते. पावसाळ्यात पाण्यामुळे रस्त्यांची स्थिती बिघडते, त्यामुळे त्या काळात केवळ अतिमहत्वाच्या आणि तातडीच्या कामांसाठीच खोदाईला परवानगी दिली जाते. मात्र, पथ विभागाने पावसाळ्याच्या काळातच पेठ भागातील काही रस्त्यांवर पोलिसांच्या सीसीटीव्ही केबलसाठी खोदाईला परवानगी दिली.
परवानगी केवळ पेठ परिसरापुरती मर्यादित असताना पोलिस प्रशासनाने शहरातील विविध भागातही खोदाई सुरू केली आहे. या कामामुळे नागरिक आणि वाहनचालक त्रस्त झाले आहेत. या संदर्भात माहिती घेण्यासाठी महापालिकेच्या पथ विभागाचे प्रमुख अनिरुद्ध पावसकर यांच्याशी संपर्क साधण्याचा प्रयत्न करण्यात आला; मात्र तो होऊ शकला नाही.
खोदाईदरम्यान ठेकेदाराने गॅस आणि वीज वाहिनीकडे दुर्लक्ष केल्याचे लक्षात आल्यावर सहदेव ढावरे यांनी या त्रुटींबाबत लक्ष वेधले. त्यांनी नियमांचे उल्लंघन होत असल्याचे सांगितले असता, संबंधित ठेकेदाराने ही बाब पोलिसांना कळवली. त्यानंतर पोलिस सहाय्यक आयुक्त आणि दोन निरीक्षक घटनास्थळी दाखल झाले आणि त्यांनीच ढावरे यांना दमदाटी करत गुन्हा दाखल करण्याची धमकी दिल्याची माहिती ढावरे यांनी दिली. या घटनेमुळे पोलिसांच्या कारभाराबद्दल गंभीर प्रश्न उपस्थित झाले आहेत.
