पुणे: पुणे महानगरपालिकेने आयुक्त नवल किशोर राम यांच्या आदेशानंतर शहरातील अतिक्रमणे आणि अनधिकृत बांधकामांवर कारवाई तीव केली आहे. गेल्या दोन दिवसांपासून अनेक अतिक्रमणे हटवण्यात आली आहेत.
गुरुवारी (दि.18) देखील भरपावसात औंध, बाणेर क्षेत्रीय कार्यालय तसेच धनकवडी, सहकारनगर क्षेत्रीय कार्यालयाअंतर्गत कात्रज परिसरात मोठी कारवाई करण्यात आली. तर ढोले पाटील रस्ता, कोथरूड- बावधन, वारजे- कर्वेनगर, कोंढवा- येवलेवाडी व बिबवेवाडी क्षेत्रीय कार्यालयांच्या हद्दीत दोन दिवसांत अतिक्रमणे व बांधकामे पाडण्यात आली. (Latest Pune News)
शहरातील विविध भागात अतिक्रमण व अनधिकृत बांधकामाविरोधात महापालिकेकडे मोठ्या प्रमाणात तक्रारी आल्या होत्या. या तक्रारींची दखल घेऊन आयुक्त नवल किशोर राम यांनी अतिक्रमण व बांधकाम विभागाला कारवाई करण्याचे आदेश दिले आहेत. त्यानुसार गुरुवारी औंध, बाणेर क्षेत्रीय कार्यालय हद्दीत डॉ. बाबासाहेब आंबेडकर चौक ते खडकी रेल्वे स्टेशन (दुतर्फा), डॉ. बाबासाहेब आंबेडकर चौक ते भाऊ पाटील रस्ता हॅरिस बीज इत्यादी ठिकाणी अनधिकृत व्यावसायिकांवर अतिक्रमण निर्मूलन कारवाई करण्यात आली.
या कारवाईत फंट मार्जिन, साईड मार्जिन तसेच अनधिकृतपणे उभारलेले कच्चे बांधकाम, हॉटेल, दुकाने, कच्चे - पक्के शेड असे जवळपास 98 अनधिकृत शेड पाडण्यात आले. ही कारवाई अतिक्रमण उपायुक्त संदीप खलाटे व सहाय्यक आयुक्त गिरीश दापकेकर यांच्या मार्गदर्शनाखाली बांधकाम विभागाच्या कनिष्ठ अभियंता कामिनी घोलप, क्षेत्रीय अतिक्रमण निरीक्षक राहुल बोकन, सहायक अतिक्रमण निरीक्षक वैभव जगताप, राहुल डोके, हाशम पटेल, पंकज आवाड यांची पथकाने केली.
कोथरूड, बावधन क्षेत्रीय कार्यालय व घोले रस्ता, शिवाजीनगर क्षेत्रीय कार्यालय अतिक्रमण विभागाने देखील या कारवाईसाठी मदत केली. कर्मचाऱ्यांनी तंबू, लोखंडी जाळ्या, फीज, काउंटर, लोखंडी मांडणी, टेबल, फर्निचर, लोखंडी कॉट असे तीन ट्रक साहित्य जप्त करत 67,365 चौरस फूट क्षेत्र रिकामे केले.
धनकवडी- सहकारनगर क्षेत्रीय कार्यालय हद्दीत कात्रज चौक परिसरातही संदीप खलाटे यांच्यासह, परिमंडळ उपायुक्त विजयकुमार थोरात तसेच सहाय्यक आयुक्त धनकवडी- सहकारनगर क्षेत्रीय कार्यालय सुरेखा भणगे यांच्या नेतृत्वात मोठी कारवाई करण्यात आली.
कनिष्ठ अभियंता विक्रांत क्षीरसागर, अतिक्रमण निरीक्षक सागर विभुते, तसेच सहाय्यक अतिक्रमण निरीक्षकांच्या पथकाने ही कारवाई करत 2500 चौरस फूट क्षेत्र मोकळे केले. या कारवाईत पाच ट्रक साहित्य जप्त केले गेले. मंगळवार व बुधवारी सार्वजनिक रस्ते पदपथावरील तब्बल 31 हजार 700 चौरस फूट अनधिकृत अतिक्रमणे काढण्यात आली. यात 13 हातगाडी, 41 पथारी, 10 सिलिंडर, 88 झोपड्या, इतर 83 यावर कारवाई करण्यात आली.
धनकवडी परिसरातील अनधिकृत फ्लेक्स काढले
धनकवडी : धनकवडी, सहकारनगर कार्यालयाच्या हद्दीत विनापरवाना लावण्यात आलेल्या फ्लेक्स, बॅनरवर कारवाई करण्यात आली. 38 फ्लेक्स, 59 बोर्ड आणि 21 बॅनर काढण्यात आले आहेत. तसेच फ्लेक्ससाठी वापरलेलेेे बांबुचे सांगाडेही जप्त करण्यात आले असल्याची माहिती नितीन जगदाळे यांनी दिली.
धनकवडी, बालाजीनगर, भारती विद्यापीठ परिसर आणि सातारा रोडवर गणेशोत्सवापासून मोठ्या प्रमाणात अनधिकृीत फ्लेक्स आणि बोर्ड लावण्यात आले होते. यामुळे परिसराचे विद्रुपीकरण होत असल्याने नागरिकांकडून कारवाई करण्याची मागणी होत होती. सहाय्यक आयुक्त सुरेखा भणगे यांच्या नियंत्रणाखाली परवाना निरीक्षक नितीन जगदाळे, सचिन बोडके आणि कर्मचाऱ्यांनी ही कारवाई केली.
