जेजुरी: खंडोबा देवाच्या माघी पौर्णिमा यात्रेनिमित्त मानाच्या होलम, होळकर, खैरे आणि प्रासादिक शिखर काठ्यांचा देवभेटीचा सोहळा जेजुरी गडावर जल्लोषात पार पडला. या वेळी हजारो भाविकांनी भंडार्याची उधळण करून ‘येळकोट येळकोट जय मल्हार’चा जयघोष केला.
मानाच्या व गावोगावच्या शिखर काठ्या माघी पौर्णिमेच्या दुसर्या दिवशी जेजुरी गडावर नेऊन त्या खंडोबा मंदिराला टेकवून देवभेट घेण्याची परंपरा अनेक पिढ्यांपासून सुरू आहे. संगमनेर येथील होलम राजा, सुपे येथील खैरे आणि होळकर यांच्या मानाच्या शिखर काठ्या दरवर्षी जेजुरी गडावर येऊन देवभेटीचा सोहळा साजरा करतात.
माघी पौर्णिमेनिमित्त गुरुवारी (दि. 13) सकाळी संगमनेर होलम राजाची शिखर काठी चिंचेची बाग, ऐतिहासिक गौतमेश्वर मंदिर, मारुती मंदिरमार्गे गडावर वाजतगाजत आणण्यात आली. सकाळी 11 वाजता होलम राजाच्या शिखर काठीचा देवभेट सोहळा पार पडला. या वेळी हजारो भाविकांनी भंडार्याची उधळण करून जल्लोष केला.
दुपारी 1 वाजता सुपे येथील खैरे व जेजुरीमधील अहिल्यादेवी होळकर यांची मानाची शिखर काठी गडावर वाजतगाजत आली. त्यानंतर देवभेटीचा सोहळा उत्साहात पार पडला. या वेळी इतर सुमारे पन्नास प्रासादिक शिखर काठ्यांनी देवभेट घेतली.
या वेळी शिखर काठीचे मानकरी संगमनेर मल्हारी मार्तंड खंडोबा होलम राजा देवस्थानचे अध्यक्ष तुकाराम काटे महाराज, दिलीप गुंजाळ, मंगेश म्हेत्रे, काशिनाथ होलम, गणेश काटे तसेच या उत्सवानिमित्त संगमनेरचे आमदार अमोल खताळ, खैरे सुपे यांचे मानकरी शहाजी खैरे, आबा खैरे, शरद खैरे, भगवान खैरे, देविदास भुजबळ, अमोल अपसुंदे, नवनाथ लांडगे, रामनाथ ढिकले व होळकर काठीचे मानकरी बबनराव बयास, मिलिंद माने, बाळू नातू, देविदास बयास, सचिन नातू, सागर गोडसे या मानकर्यांचा जेजुरी देवसंस्थानचे प्रमुख विश्वस्त अभिजित देवकाते, विश्वस्त अॅड. विश्वास पानसे व मंगेश घोणे, अॅड. पांडुरंग थोरवे यांच्या हस्ते सन्मान करण्यात आला.
या वेळी देवसंस्थानचे व्यवस्थापक आशिष बाठे, अधिकारी सतीश घाडगे, गणेश डिखळे, बाळा खोमणे, सागर गोडसे, महेश नाणेकर आदी उपस्थित होते. जेजुरी पोलिस ठाण्याचे सहायक पोलीस निरीक्षक दीपक वाकचौरे यांच्या मार्गदर्शनाखाली पोलिस बंदोबस्त तैनात करण्यात आला होता.
