Pune New Terminal| नवीन टर्मिनल अखेर सुरू

बहुप्रतीक्षित नवीन विमानतळ टर्मिनल अखेर रविवारी (दि. १४) सुरू झाले. पुण्यातील मान्यवर आणि केंद्रीय हवाई राज्यमंत्र्यांच्या उपस्थितीत हे टर्मिनल सुरू करण्यात आले. टर्मिनलला आकर्षक विद्युतरोषणाईने सजविण्यात आले होते.

टर्मिनल सुरू करण्यासाठी आलेल्या समस्या सोडवून अखेर रविवारपासून पुण्यातील नवीन टर्मिनल सुरू करण्यात आले. केंद्रीय हवाई राज्यमंत्री मुरलीधर मोहोळ, खासदार मेधा कुलकर्णी, महापालिका आयुक्त राजेश भोसले, विमानतळ संचालक संतोष ढोके, केंद्रीय सुरक्षा बलाचे अधिकारी, विमान कंपन्यांचे अधिकारी यांच्या हस्ते दीपप्रज्वलन करून आणि केक कापून या टर्मिनलला हिरवा सिग्नल देण्यात आला.

नवीन टर्मिनलवरून पुण्याहून दिल्लीसाठी एअर इंडियाचे पहिले उड्डाण (फ्लाईट क्रमांक एआय-८५८) झाले. लेफ्टनंट कर्नल मनीषा डबास या नवीन टर्मिनलवरून प्रवास करणाऱ्या पहिल्या प्रवासी ठरल्या.

रविवारी दुपारी केंद्रीय हवाई राज्यमंत्री मुरलीधर मोहोळ यांच्या हस्ते डबास यांना बोर्डिंग पास देण्यात आला. त्यानंतर एअर इंडिया एक्स्प्रेसचे पुण्याहून भुवनेश्वरसाठी दुसरे उड्डाण (फ्लाईट क्रमांक आय ५- ३२०) झाले. त्या विमानाच्या प्रवाशांनादेखील केंद्रीय राज्यमंत्री मोहोळ यांच्या हस्तेच बोर्डिंग पास देण्यात आला.

केंद्रीय मंत्र्यांच्या हस्ते बोर्डिंग पास मिळाल्यामुळे या प्रवाशांनी आनंद व्यक्त केला. मुरलीधर मोहोळ म्हणाले, गेल्या दहा वर्षांत देशात ७५ नवीन विमानतळे तयार झाली आहेत, ४६९ नवीन हवाई रस्ते मोदीजींच्या नेतृत्वात तयार झाले. गेल्या दहा वर्षांतील कामाचा आलेख पाहिला तर जगातील तिसरे सर्वात मोठे एव्हिएशन सेक्टर आपल्या देशाचे आहे.

हा प्रत्येक भारतीयांसाठी अभिमानाचा क्षण आहे. येत्या काळात या देशात २० ते २५ नवीन विमानतळे या देशात कार्यान्वित होत आहेत. आपण पाहिले नवीन टर्मिनल नववधू सारखे सजवण्यात आले होते.तर या नवीन टर्मिनलची खूप विशेषतः आहे. २२ हजार ३०० स्क्वे, मीटर जुन्या टर्मिनलचे क्षेत्रफळ होते.

आता ५२ हजार स्क्वे. मीटर नव्या टर्मिनलचे क्षेत्रफळ आहे. वर्षातून जवळपास ९० लाख ते १ कोटी प्रवासी येथून प्रवास करू शकणार आहेत. पहिल्या फेरीत आज एअर इंडिया आणि एअर इंडिया एक्स्प्रेसच्या सुविधा सुरू होत आहे.

रविवारी नवीन टर्मिनल येथून नऊ विमाने उखाणे करतील, तर तितकीच नऊ विमाने येथे उतरतील. उद्यापासून या संख्येत वाढ होणार असून, दिवसाला १६ विमानांची उड्डाणे आणि १६ विमानांचे आगमन नवीन टर्मिनलवर होईल. जुन्या विमानतळातील सर्व गोष्टी हळूहळू शिफ्टींग होतील. सीआयएसएफ जवान आणि पाच कन्व्हेयर बेल्टचीदेखील अत्याधुनिक सुविधा उपलब्ध आहे. यामुळे प्रवाशांचा प्रवास सुखकर होईल.