पीएमपी अ‍ॅपचे सहा लाखांपेक्षा अधिक वापरकर्ते

पुणे: पीएमपीने आता तंत्रज्ञानाच्या क्षेत्रातही पाऊल टाकून, तिकीट पासची ऑनलाइन विक्री होण्यासाठी ‘आपली पीएमपीएमएल’ हे अ‍ॅप सुरू केले आहे. या अ‍ॅपला पुणेकर प्रवाशांचा चांगला प्रतिसाद मिळत असून, या अ‍ॅपचे सहा लाखांपेक्षा अधिक वापरकर्ते झाले आहेत.

त्याद्वारे प्रशासनाला दररोज 20 लाखांपेक्षा अधिक उत्पन्न मिळत आहे. आगामी काळात याचे वापरकर्ते वाढून पीएमपी कॅशलेस होईल, असा विश्वास पीएमपी अधिकार्‍यांकडून व्यक्त करण्यात आला आहे.

पीएमपीकडे ओला, उबेरप्रमाणे स्वत:चे अ‍ॅप असावे, प्रवाशांना तंत्रज्ञानाच्या युगात पीएमपीकडूनही अत्याधुनिक सुविधा उपलब्ध व्हावी अन् पीएमपीतील सर्व व्यवहार कॅशलेस व्हावा, याकरिता दै. ‘पुढारी’कडून सातत्याने वृत्त प्रसिध्द करून अ‍ॅप आणि ऑनलाइन तिकीट सुविधा उपलब्ध होण्यासाठी पाठपुरावा करण्यात येत होता.

अखेर त्याची प्रशासन पातळीवर दखल घेत हे अ‍ॅप सुरू झाले. पीएमपीने कात टाकत, तंत्रज्ञानाच्या युगात आपले पाऊल ठेवले. सध्या या अ‍ॅपला प्रवाशांचा चांगला प्रतिसाद मिळत असून, सहा लाखांपेक्षा अधिक याचे वापरकर्ते झाले असल्याचे पीएमपीच्या अधिकार्‍यांनी सांगितले.

आयफोनधारकांसाठी आयओएस व्हर्जन

पूर्वी पीएमपीएमएलचे अ‍ॅप फक्त अँड्रॉइड फोनमध्येच चालत होते. प्ले स्टोअरवर ते अँड्रॉईड मोबाईल वापरणार्‍यांसाठी उपलब्ध होते. मात्र, आयफोन वापरणारे प्रवासी या अ‍ॅपपासून वंचित होते. त्यांच्यासाठी पीएमपीने नुकतेच या अ‍ॅपचे आयओएस व्हर्जन सुरू केले आहे. त्यामुळे आयफोन वापरणार्‍यांनादेखील या अ‍ॅपचा लाभ घेता येत आहे.

पीएमपी अ‍ॅपचे फायदे

• सर्व बसमार्गांची माहिती समजते.

• बसचे लाइव्ह लोकेशन समजते, लाइव्ह ट्रॅकिंग होते.

• बस थांब्यावर किती वेळात येणार, हेदेखील समजणे शक्य झाले आहे.

• ऑनलाइन तिकीट काढता येते.

• दैनंदिन पासदेखील काढता येतो. प्रवाशांना 40, 50 व 120 रुपयांचे दैनंदिन पास काढता येतात.

• मोबाईल अ‍ॅपवरून प्रवाशांना त्यांच्या तक्रारीदेखील नोंदविता येतात.

• आपली पीएमपीएमएल मोबाईल अ‍ॅपवरून मेट्रो तिकीटदेखील काढता येतात.