पुणे: सिंहगड रस्ता परिसरातील माणिकबाग येथे पीएमपीएल बसने दुचाकीला धडक दिली. यात दुचाकीस्वार महिला गंभीर जखमी झाली. ही घटना गुरुवारी (१ ऑक्टोबर) दुपारी साडेचारच्या सुमारास कल्पतरू सोसायटीसमोर, गोयल गंगा सिग्नलजवळ घडली.
दीपाली संदीप कपूर (४९, रा. धायरी) असे जखमी महिलेचे नाव आहे. अपघातात त्यांच्या हाताला आणि पायाला गंभीर दुखापत झाली. घटनेची माहिती मिळताच सिंहगड रस्ता पोलिस ठाण्याचे वरिष्ठ पोलिस निरीक्षक विनय पाटणकर यांच्यासह पोलिस कर्मचारी घटनास्थळी दाखल झाले. त्यांनी जखमी महिलेला तातडीने रुग्णालयात उपचारासाठी दाखल केले.
पोलिसांच्या माहितीनुसार, पीएमपीएल बस खडकवासला बाजूकडून स्वारगेटच्या दिशेने जात होती. त्या वेळी बसच्या पुढे असलेल्या दुचाकीला धडक बसली. त्यानंतर दुचाकी बसच्या डाव्या बाजूच्या चाकाखाली आल्याने महिला जखमी झाली.
याप्रकरणी बसचालक संदीप शहाळे याला पोलिसांनी ताब्यात घेतले आहे. अपघाताचे नेमके कारण तसेच घटनेबाबत तपास सिंहगड रस्ता पोलिस करत आहेत.
