पुणे: राज्यात गुरुवारी (दि. ९ जुलै) अनेक संघटनांनी 'शाळा बंद' आंदोलनाची हाक दिली आहे. त्या पार्श्वभूमीवर माध्यमिक व उच्च माध्यमिक शिक्षण संचालक डॉ. महेश पालकर यांनी सर्व विभागीय उपसंचालक व शिक्षणाधिकाऱ्यांना कोणतीही शाळा बंद राहू नये, असे निर्देश दिले आहेत. तसेच, शाळा बंद ठेवल्यास संबंधित कर्मचाऱ्यांचा एका दिवसाचा पगार कापणार आहेत.
कार्यरत शिक्षकांना शिक्षक पात्रता परीक्षा (टीईटी) अनिवार्यता, पदोन्नती प्रक्रियेतील अटी, संचमान्यता धोरण आणि (बीएलओ) कामाच्या सक्तीविरोधात गुरुवारी राज्यव्यापी 'शाळा बंद' आंदोलन करण्यात येणार आहे.
या आंदोलनात महाराष्ट्र राज्य प्राथमिक शिक्षक समितीसह महाराष्ट्र राज्य प्राथमिक शिक्षक मध्यवर्ती संघटना, शिक्षक समन्वय समिती, महाराष्ट्र टीईटी/सीटीईटी उत्तीर्ण सीनिअर शिक्षक कृती समिती, महाराष्ट्र खासगी शाळा शिक्षक संघटना, शैक्षणिक व्यासपीठ, मुख्याध्यापक संघ आणि इतर शिक्षक संघटना सहभागी होणार आहेत.
मुंबईतील आझाद मैदानावर धरणे आंदोलन, तर राज्यभर मोर्चे काढण्यात येणार असल्याचे संघटनांच्या प्रतिनिधींनी स्पष्ट केले आहे. यासंदर्भात महाराष्ट्र राज्य प्राथमिक शिक्षक समितीचे राज्याध्यक्ष विजय कोंबे आणि राज्य सरचिटणीस राजन कोरगावकर यांनी परिपत्रक जारी केले आहे.
