पुणे: राज्य शासनाच्या वतीने कोरेगाव भीमा विजयस्तंभ स्मारकाची विकासकामे लवकरच सुरू होणार आहेत. सामाजिक न्यायमंत्री संजय शिरसाट यांनी अर्थसंकल्पात 100 कोटी रुपयांची तरतुदीची शिफारस केली आहे.
त्यापेक्षाही जास्तीचा निधी शासनाच्या वतीने उपलब्ध करून देण्यात येणार असल्याची माहिती विधानसभेचे नवनिर्वाचित उपाध्यक्ष आमदार अण्णा बनसोडे यांनी विजयस्तंभ येथे पत्रकारांशी बोलताना दिली.
विधानसभेच्या उपाध्यक्षपदी निवड झाल्यानंतर आमदार अण्णा बनसोडे यांनी नुकतीच ऐतिहासिक कोरेगाव भीमा विजयस्तंभ स्मारकास भेट देऊन पुष्पचक्र अर्पण करून अभिवादन केले. तसेच, त्यांनी छत्रपती संभाजी महाराज यांचे समाधिस्थळ असलेल्या तुळापूर, वढू बुद्रुक येथील तसेच शूरयोद्धा गोविंद गोपाळ गायकवाड समाधिस्थळी भेट देऊन अभिवादन केले.
विजयस्तंभ येथे बार्टी संस्थेच्या वतीने त्यांना डॉ. बाबासाहेब आंबेडकर यांची प्रतिमा, विजयस्तंभाची प्रतिकृती व भारताचे संविधान हे अॅड. गौरक्ष लोखंडे, सुमेध थोरात, रामदास लोखंडे यांच्या हस्ते भेट देऊन सन्मानित करण्यात आले.
रामदास लोखंडे यांनी कोरेगाव भीमा विजयस्तंभ जागेबाबत उच्च न्यायालयात सुरू असलेल्या न्यायप्रविष्ट प्रकरणाची माहिती देऊन बार्टी संस्थेचे महासंचालक सुनील वारे यांनी कोरेगाव भीमा विजयस्तंभ स्मारकाचा विकास आराखडा शासनास सादर केल्याचे सांगितले.
या प्रसंगी राहुल कवडे, पेरणेच्या सरपंच उषा वाळके, कोरेगाव-भीमाचे सरपंच संदीप ढेरंगे, विस्तार अधिकारी मोरे, मंडल अधिकारी संदीप झिंगाडे, ग्रामपंचायत सदस्य सुनील आवचर, साईनाथ वाळके, राजाभाऊ गवदे, भारतीय बौद्ध महासभेचे कोमल वासनिक, सुधाकर लोखंडे, ग्रामविकास अधिकारी रतन दवणे आदी उपस्थित होते.
