पुणे : अडीच लाखांच्या बदल्यात व्याजासह तब्बल 16 लाख 83 हजार रुपये देऊनही आणखी 12 लाखांची मागणी करणार्या व शिवीगाळ करीत जिवे मारण्याची धमकी देणार्या सावकारावर खराडी पोलिस ठाण्यात सावकारी अधिनियमानुसार गुन्हा दाखल केला आहे. प्रशांत गुरुनाथ गायकवाड (रा. रक्षकनगर, खराडी, पुणे) याच्यावर हा गुन्हा दाखल केला आहे. हा प्रकार फेब—ुवारी 2023 ते जुलै 2025 दरम्यान घडला. याबाबत हितेश रवी उत्तमचंदानी (वय 36, रा. आलिशान कॉर्नर, लुल्लानगर) यांनी पोलिस ठाण्यात तक्रार दिली. (Pune Latest News)
पोलिसांनी दिलेल्या माहितीनुसार, हितेश उत्तमचंदानी हे व्यावसायिक आहेत. ते लुल्लानगर येथे राहण्यास असून, त्यांचा कैलास डेअरी फार्म नावाचा व्यवसाय आहे. 2021 ते 2024 दरम्यान त्यांचे खराडीतील झेन्सार आयटी पार्कसमोर कैलास डेअरी नावाचे मिठाईचे व दुग्धपदार्थांचे दुकान होते. 2023 मध्ये आरोपी प्रशांत गायकवाड हा त्यांच्या दुकानात लस्सी पिण्यासाठी गेला होता. त्यानंतर तो सातत्याने दुकानात जात होता. त्यामुळे हितेश अणि प्रशांत यांची चांगली ओळख झाली. यातूनच प्रशांत याच्याकडून हितेश यांनी दोन लाख 51 हजार रुपये घेतले. त्याबदल्यात व्याजासह 16 लाख 83 हजार ऑनलाइन व रोख स्वरूपात दिले. त्यानंतर 2024 मध्ये त्याने हितेश यांना फोन करून अरेरावीची भाषा करीत 12 लाख देणे बाकी आहे, असे सांगून पैशांची मागणी केली. त्यानंतर प्रशांतने 17 जुलै रोजी हितेश यांच्या राहत्या घरी जात जोरजोरात दरवाजा ठोठावला. त्यांच्या पत्नीला तुझा नवरा कोठे आहे म्हणत, मी कोण आहे,अशी धमकी दिल्याचे व जिवे मारण्याची धमकी देत असल्याचे तक्रारीत म्हटले आहे.
