खडकवासला: पावसाळी वातावरण असले तरी पानशेत - वरसगाव खोर्यात तुरळक प्रमाणात पाऊस पडत आहे. त्यामुळे खडकवासला साखळीत मंदगतीने वाढ सुरू आहे. गुरुवारी सायंकाळी पाच वाजता धरणसाखळीत 23.78 टीएमसी म्हणजे 81.58 टक्के साठा झाला होता. गेल्या 24 तासात धरणसाठ्यात 0.35 टीएमसीची वाढ झाली. बुधवारी (दि. 23) सायंकाळी पाच वाजता धरणसाखळीत 23.43 टीएमसी साठा होता.
गुरुवारी दिवसभरात टेमघर येथे 15, वरसगाव येथे 9, पानशेत येथे 7 मिलिमीटर पाऊस पडला. खडकवासला येथे पावसाची नोंद झाली नाही. खडकवासला जलसंपदा विभागाचे उपविभागीय अभियंता मोहन भदाणे म्हणाले, पावसाच्या रिमझिमने धरणसाठ्यात हळूहळू वाढ सुरू आहे. धरणसाखळीत समाधानकारक पाणीसाठा झाला आहे. वरसगाव व पानशेत धरण नव्वद टक्के भरण्याच्या मार्गावर आहे. (Latest Pune News)
रायगड जिल्ह्याच्या हद्दीवरील पानशेत, वरसगाव धरणक्षेत्रात गुरुवारी सकाळी चांगला पाऊस पडला. दुपार नंतर पावसाचा जोर कमी झाला. मोसे,आंबी, मुठा नद्यांसह ओढ्या नाल्यांतुन पाण्याचे प्रवाह सुरू आहेत. त्यामुळे धरणसाठ्यात हळूहळू वाढ सुरू आहे.
खडकवासला धरणसाखळी
एकूण पाणी साठवणक्षमता 29.15 टीएमसी
गुरुवारचा पाणीसाठा
23.78 टीएमसी (81.58 टक्के)
