पुणे: महायुती सरकारने घेतलेल्या मुलींच्या फी माफीसाठी राज्याचे उच्च व तंत्र शिक्षणमंत्री चंद्रकांत पाटील अॅक्शन मोडवर आले असून, त्यांनी गरवारे महाविद्यालयास अचानक भेट देऊन मुलींच्या फीमाफी निर्णयाच्या अंमलबजावणीचा आढावा घेतला तसेच राज्यातील 100 महाविद्यालयांना अचानक भेट देणार असल्याचा मानसही त्यांनी या वेळी व्यक्त केला.
उच्च शिक्षणातील मुलींचे प्रमाण वाढावे, यासाठी राज्य सरकारने व्यावसायिक आणि वैद्यकीय शिक्षणाचे शुल्क माफ करण्याचा निर्णय घेतला होता. त्यासाठी एकूण 842 कोर्सेससाठी राज्य सरकारने अर्थसंकल्पात दोन हजार कोटींची तरतूद केली आहे.
संबंधित निर्णयाच्या अंमलबजावणीतील शैक्षणिक संस्थांसमोरील अडचणी दूर करण्यासाठी शासनाने दिशानिर्देश देखील जारी केले होते. तसेच, उच्च व तंत्र शिक्षण संचालनालयाच्या माध्यमातून भरारी पथक नेमून विद्यार्थिनींच्या तक्रारींची दखल घेतली जात होती.
या निर्णयाचा आत्तापर्यंत किती विद्यार्थिनींना लाभ झाला, याचा प्रत्यक्ष आढावा राज्याचे उच्च व तंत्र शिक्षणमंत्री चंद्रकांत पाटील यांनी घेण्यास सुरुवात केली असून, त्यांनी गरवारे महाविद्यालयामधील विद्यार्थिनींशी संवाद साधत अडचणी जाणून घेतल्या.
या वेळी पाटील म्हणाले की, उच्च शिक्षणाचा खर्च परवडत नसल्याने अनेक मुलींना शिक्षणापासून वंचित राहावे लागते. याचा आढावा घेण्यास सुरुवात केली आहे. मुलींनी देखील 31 मार्चपर्यंत महाविद्यालयात शासनाने नेमलेल्या नोडल अधिकार्यांशी संपर्क साधून फीमाफीसाठी आवश्यक कागदपत्रांची पूर्तता करावी; जेणेकरून मुलींना या निर्णयाचा लाभ घेता येईल. तसेच, विद्यार्थिनींच्या अडचणी समजून घेण्यासाठी प्रत्येक महाविद्यालयाने विद्यार्थी आणि महाविद्यालय प्रशासन यांची संयुक्त समिती स्थापन करावी, अशी सूचना या वेळी केली.
राज्यभरातील शंभर महाविद्यालयांना देणार भेट
राज्यातील शंभर महाविद्यालयांना अशा प्रकारे अचानक भेट देऊन मुलींच्या फीमाफीचा आढावा घेणार असून, मुंबईतील वांद्रे येथील थडोमल शहानी महाविद्यालयातून सुरुवात केली आहे. पुण्यातील गरवारे दुसरे महाविद्यालय असल्याचेही त्यांनी या वेळी सांगितले.
कमवा आणि शिका’ तत्त्वावर शिक्षण घेणार्या विद्यार्थ्यांचा भत्ता वाढविण्याची मागणी काही विद्यार्थ्यांनी या वेळी केली असता त्यासाठी प्रयत्न करू, अशी ग्वाही देखील या वेळी त्यांनी दिली. या वेळी उच्च शिक्षण विभागाचे संचालक शैलेंद्र देवळाणकर, सहसंचालक प्रकाश बच्चाव हे देखील उपस्थित होते.
