पुणे : राज्यात येत्या शनिवारपर्यंत (दि. 28) कोकणात तसेच घाटमाथ्यावर अतिमुसळधार, मध्य महाराष्ट्रात मुसळधार, मराठवाड्यात हलका ते मध्यम, तर विदर्भात यलो अलर्टसह वादळी वारे, विजांचा कडकडाट आणि मेघगर्जनेसह पाऊस पडणार आहे, असा अंदाज हवामान विभागाने वर्तविला आहे. दरम्यान, गेल्या चोवीस तासांत राज्यातील काही भागांत मुसळधार पावसाने हजेरी लावली.
राज्यात मागील काही दिवसांपासून थांबलेला पाऊस पुन्हा सुरू झाला आहे. हा पाऊस आणखी वाढण्याची शक्यता आहे. सध्या उत्तर-पूर्व अरबी समुद्र ते दक्षिण झारखंडपर्यंत द्रोणीय स्थिती आहे. या स्थितीमुळे कोकण, कोल्हापूर, सातारा, पुणे आणि नाशिक घाटमाथ्यावर मुसळधार ते अतिमुसळधार पाऊस पडण्याची शक्यता आहे. तर उर्वरित मध्य महाराष्ट्र, विदर्भात देखील गेल्या काही दिवसांपासून सलग सातत्याने पाऊस पडत असून, तो अजूनही कमी झालेला नाही.
ऑरेंज अलर्ट ः पालघर, ठाणे, रायगड, रत्नागिरी, सिंधुदुर्ग, नाशिक घाटमाथा, पुणे घाटमाथा, कोल्हापूर घाटमाथा, सातारा घाटमाथा
यलो अलर्ट : मुंबई, धुळे, नंदुरबार, जळगाव, नाशिक, छत्रपती संभाजीनगर, जालना, परभणी, हिंगोली, नांदेड, अकोला, अमरावती, भंडारा, गडचिरोली, गोंदिया, वर्धा, नागपूर, वाशिम, यवतमाळ
