पुढारी ऑनलाईन डेस्क | Pune Rain : खडकवासला धरणाच्या सांडव्यावरून मुठा नदी पात्रामध्ये सुरू असणारा विसर्ग वाढवण्यात आला आहे. सकाळी 11:00 वाजता तो 35002 क्यूसेक्स इतका करण्यात आला. यामध्ये आवश्यकतेनुसार बदल संभवू शकतो. तसेच पावसाच्या प्रमाणानुसार धरणाच्या विसर्गात पुन्हा कमी/जास्त वाढ करण्याची शक्यता आहे. यामुळे खबरदारी म्हणून भारतीय लष्कराला या ठिकाणी तैनात करण्यात आले आहे. यामध्ये 105 भारतीय लष्कराचे जवान तैनात केले आहेत. भारतीय लष्कर दलाकडून बचाव कार्यासाठी होडी, ट्यूब, यासं विविध सामग्री आणली आहे.
खडकवासला येथे सात मिलिमीटर पाऊस झाला आहे. गेल्‍या 24 तासात 11 मिलिमीटर पावसाची नोंद झाली आहे. पानशेत वरसगाव येथे 14 मिलिमीटर पाऊस झाला आहे. येरवडा येथे 16 मिलिमीटर पाऊस झाला आहे. मुळशी तालुक्यातील कुंभेरी येथे 54, ताम्हिणी येथे 31 आणि लवासा येथे 17 मिलिमीटर इतका पाऊस पडला आहे.
