पुणे : साडेतीन मुहूर्तांपैकी एक असलेल्या गुढीपाडवा या हिंदू नववर्षाच्या सुरुवातीच्या दिनी गुरुवारी (दि. 19) सकाळी 6 वाजून 54 मिनिटांनंतर गुढी उभारावी. सूर्यास्ताच्या सुमारास नमस्कार करून गुढी उतरवून ठेवावी, अशी माहिती पंचांगकर्ते मोहन दाते यांनी दिली. गुरुवारी गुढीपाडव्याचा सण उत्साहात साजरा केला जाणार असून, सणानिमित्त घरोघरी तयारीला सुरुवात झाली आहे.
नवीन शके 1948 या संवत्सराचे नाव ‘पराभव संवत्सर’ असे आहे. गुढीपाडव्याच्या दिवशी आपल्या नवीन वर्षाची सुरुवात होते. या दिवशी सकाळी घरोघरी गुढी उभारून, तोरण लावून नवीन वर्षाचे स्वागत केले जाते.
आपली कालगणना हजारो वर्षे जुनी आहे. ती ग्रहांवर आधारित कालगणना पंचांगाच्या माध्यमातून आपल्याला कळते. म्हणून संवत्सर आरंभाच्या दिवशी गुढीबरोबर पंचांगावरील गणपतीचे पूजन करावयास सांगितले आहे. हा उत्सव घरोघरी करावयाचा असल्यामुळे आपण स्वतंत्रपणे राहत असल्यास आपल्या घरीही पूजा करून गुढी उभी करावी, गुढीपूजनाकरिता वेगळा असा विधी नाही. गुढी उभी करणे, हे मांगल्याचे प्रतीक आहे, असे दाते यांनी सांगितले.
