बोपदेव घाट परिसरात गुन्हेगारी वर्चस्व प्रस्थापित करण्यासाठी एका नामांकित कॉलेजबाहेरील रोडवर तरुणाला कोयत्याने मारहाण करणार्या टोळक्याला कोंढवा पोलिसांनी गजाआड केले आहे. याप्रकरणी 7 जणांना अटक करण्यात आली असून, त्यांच्याकडून शस्त्र आणि वाहने असा 3 लाख 80 हजारांचा मुद्देमाल जप्त केला आहे.
भावेश कुंजीर (वय 23, रा. सासवड), अथर्व पवार (वय 21, रा. बी. टी. कवडे रोड, दळवीनगर, घोरपडी), सूरज राऊत (वय 21, रा. सासवड- बोपदेव घाट रोड, येवलेवाडी), आर्यन पवार (वय 18, रा. ओम सोसायटी, दळवीनगर, घोरपडी), सौरभ लोंढे (वय 18, रा. संदेश सहकारी सोसायटी, संभाजीनगर, धनकवडी, मूळ रा. सातेफळ, ता. कळंब, जि. धाराशिव), राज रोंगे (वय 19, रा. सिंगापूर होम्स, येवलेवाडी), वरुण भोसले (वय 21, रा. आनंदनगर, जेजुरी ता. पुरंदर) अशी अटक केलेल्यांची नावे आहेत.
येथील एका नामांकित कॉलेजसमोरील रोडवर 16 जानेवारी रोजी दुपारी एकच्या सुमारास विश्वजित हुलवळे (वय 19, रा. येवलेवाडी) याला कोयत्याने मारहाण करून जबर जखमी केले होते. त्याने दिलेल्या तक्रारीनुसार कोंढवा पोलिसांनी खुनाचा प्रयत्न केल्याचा गुन्हा दाखल केला होता. या गुन्ह्यातील आरोपींचा शोध घेत असताना 18 जानेवारी रोजी पोलिस हवालदार सतीश चव्हाण व विशाल मेमाणे यांना बातमीदारामार्फत बातमी मिळाली की, गुन्ह्यातील आरोपी हे राज रोंगे याच्या येवलेवाडीतील सिंगापूर होम्स येथील सदनिकेत लपले आहेत. त्यानुसार पथकाने तत्काळ तेथे छापा टाकून आरोपींना ताब्यात घेतले. त्यांच्याकडून गुन्ह्यात वापरलेली धारदार शस्त्रे व वाहने असा एकूण 3 लाख 80 हजारांचा माल जप्त केला आहे.
ही कारवाई पोलिस उपायुक्त डॉ. राजकुमार शिंदे, सहायक पोलिस आयुक्त धन्यकुमार गोडसे, वरिष्ठ पोलिस निरीक्षक विनय पाटणकर, पोलिस निरीक्षक (गुन्हे) अब्दुल रौफ शेख, सूरज बेंद्रे यांच्या मार्गदर्शनाखाली पोलिस उपनिरीक्षक बालाजी डिगोळे, पोलिस हवालदार अमोल हिरवे, सतीश चव्हाण, नीलेश देसाई, विशाल मेमाणे, गोरखनाथ चिनके यांच्या पथकाने केली आहे.
